ANA SƏHİFƏ / YAZARLAR

EVİN TİKİLSİN, AYGÜN KAZIMOVA

Evin sökülməsin, Əbülfət Mədətoğlu!

21952    |   2009-02-21 07:16
Şriftin ölçüsü:
A+ Böyütmək
A+ Balacalaşdır

Hərə bir söz deyir. Biri deyir Bakıda evlər ucuzlaşıb. O qədər ucuzlaşıb ki, hətta su qiymətinə də Bakıda mənzil almaq olar. Digərinə də inanmamaq olmur. And içib aman edir ki, evlərin qiyməti yenə qalxıb. İndi Amerikada, İngiltərədə, Fransada, İspaniyada dəbdəbəli malikanələrə xərclənən pula Bakıda heç quş damı da almaq mümkün deyil. "Tarqovı" tərəfdə beşotaqlı ev almaq istəyənlər indi Pirallahı tərəflərdə heç bir otaqlı mənzil belə ala bilmirlər.
   
   Sözün düzünə qalsa, şəxsən mən belə mübahisələrə qoşulmuram. Ev olmayandan sonra mübahisəyə, vaxt itirməyə dəyərmi? Lakin elə xəbərlər gəlir ki, ona biganə qalmaq mümkünsüzdü. Elə götürək Aygün Kazımovayla ilgili xəbəri. Başa düşdüm, indi hamı bir ağızdan soruşacaq ki, hansı xəbəri? Çünki Aygün şou-biznesin gündəminə işləyən sənətçidi. Onunla bağlı ən azı hər gün təzə xəbər eşitmək mümkündü. Necə deyərlər, əməliyyat olunmasından soyunmasına qədər...
   
   Amma yazmaq istədiyim belə xəbərlərdən deyil. Söhbət daha ciddi mövzudan gedir. Bu günlərdə bütün gecəni növbəti ad gününü qeyd edən və bu üzdən səhər telekanalların birində aparıcısı olduğu verilişin canlı yayımına çıxa bilməyən Aygün Kazımova qiymətli hədiyyə alıb. Xalq artistinə ev bağışlanıb, özü də üçotaqlı! Bizdə xalqın yarısı evsiz-eşiksiz olsa da bütün xalq artistlərinin çoxmənzilli evi var.
   
   Həmkarlarım bu xəbərin bütün tərəflərini işləyiblər. Təzə evin sahibi həmişə olduğu kimi, bu dəfə də əliqələmlilərə bolluca mövzu verib. Mətbuatda yazılanlar bir-birini təkzib edir. Gah yazırlar ki, xalq artistinə bağışlanan mənzil hələ tikintisi başa çatmayan göydələnlərin birindədi. Gah da Aygün Kazımovanın artıq təzə mənzilə daşındığını yazırlar. Bir gün deyirlər ki, Aygün həmin evdə yaşamayacaq, oradan anbar kimi istifadə edəcək. Çünki o qədər şlyapası, ayaqqabısı, paltarı var ki, onları qoymağa yer tapmır. Bağışlanan təzə mənzil lap göydəndüşmə olub. O biri gün deyirlər ki, yox, əvvəlki xəbər həqiqəti əks etdirmir, Aygün Kazımova ona hədiyyə edilən üçotaqlı mənzili şəhid ailələrindən birinə bağışlayacaq. Çünki qızı İlqarə bunu anasından xahiş edib. Bu xəbərin də ömrü qısa oldu. İndi də deyirlər ki, belə söhbət-filan yoxdu. Aygün həmin mənzili heç kimə bağışlamayacaq. Azərbaycanda indiyə qədər hədiyyəni kim özgəsinə bağışlayıb ki?
   
   Həqiqətin hansı tərəfdə olmasını bilmək üçün gərək bir qədər gözləyək. İnşallah, göydələn tikiləndən sonra biləcəyik ki, Aygün Kazımova həmin mənzildən anbar kimi istifadə edir, özü yaşayır, yoxsa başqasına bağışlayır...
   
   Aygün Kazımova göydələnin tikilməsini gözləyir. Bu yaxınlarda 50 illik yubileyinə toplaşdığımız gözəl şair və qəzetçi dostumuz Əbülfət Mədətoğlu da gözləyir, lakin nigarançılıqla. Qarabağdan qaçqın düşəndən sonra Bakıda minbir əziyyətlə tikdiyi evi sökmək istəyirlər. Təzə avtovağzalın ətrafındakı məhəllədə məskunlaşan şair əvvəllər sübhə qədər yatmayıb ilham pərisinin gəlişini gözləyirdi. İndi isə buldozerlərin gəlib evi sökəcəyindən narahatdır və gözlərinə yuxu getmir.
   
   Buldozerçiyə nə var ki... O, heç Əbülfət Mədətoğlunu tanımır. Şairin ali təhsilli oğlu Babəkin hərbi xidmətdə olduğunu da bilmir. Amma yəqin ki, buldozerin ön şüşəsinə Aygün Kazımovanın şəklini yapışdırıb.
   
   Dünya hər gün bizi təəccübləndirməkdən elə bil ləzzət alır. Ən bahalı avtomobillərdən birini sürən, var-dövləti başından aşan müğənniyə üçotaqlı mənzil bağışlayırlar, çörəyi qəzetçilikdən çıxan qaçqın şairin evini sökürlər...
   
   Bu işləri görəndən sonra heç nə barədə düşünmək belə istəmirəm. Əlimdən də Tanrıya dua etməkdən başqa heç nə gəlmir. Evin tikilsin, Aygün Kazımova. Evin sökülməsin, Əbülfət Mədətoğlu!


YAZARIN ARXİVİ

2017-12-02 : Onun adı Rey
2016-09-30 : ...Sadə Qabil
2016-08-13 : Poeziya, Salam
2016-08-12 : Poeziya, Salam
2016-06-11 : Təhsil elçisi
2015-10-09 : Qadağaya qadağa
2015-08-29 : Birinci 10 il
2015-04-11 : Təzə Ağdamlı
2015-03-20 : Bizim Corc
2014-12-13 : "Kitayski" çex
2014-04-05 : Abini anarkən...
2014-01-11 : Əfsanə bolluğu
2013-12-28 : Sonuncu alman
2013-11-30 : Nə sözün?
2012-08-09 : Gedin və baxın!
2012-05-30 : Məqsədli yazı
2011-08-27 : A+A+A
2011-01-08 : Hamı telekanala!
2010-10-02 : Al bıçağı...
2010-06-19 : Top, tar və...
2009-12-12 : 2012
2009-06-20 : YILMAZ, BU KİM?
2009-03-20 : DAVALI YORĞAN
2008-05-24 : Nazirlər soyunur
2008-04-26 : Qalxa-qalxa gedir
2008-03-30 : Tərcümeyi-hal
2008-03-01 : Mənə "beş" ver
2007-11-10 : Reklamlı yazı
SON XƏBƏRLƏR
2018-01-16


VİDEO



ƏDALƏT BU GÜN
Redaktor seçimi
FOTOREPORTAJ
GÜNÜN SİTATI
SORĞU
Təbii qaz limitini keçmisinizmi?

Hə (71.43%)
Yox (28.57%)

ÇOX OXUNAN
GÜNÜN LƏTİFƏSİ
Maarif Soltanın İsmayıllıdakı kənddəki evinə bir sarsaq pişik dadanıbmış, şairi yığıbmış boğaza. Aparıb pişiyi meşədə azdırır, gəlir görür ki, pişik evdədi. Aparıb bir az uzaqda azdırır, gəlir görür ki, yenə ondan qabaq gəlib, evdədi. Aparıb "Qız qalası" tərəfdə meşədə azdırır, yenə qayıdıb görür ki, ondan qabaq gəlib.
Axırda hirslənib aparır Babadağının ən ucqar bir yerində azdırır. Bir neçə saatdan sonra xanımına zəng edir:
- Pişik gəlib çıxıb?
- Hə.
- Ver telefonu pişik oğlu pişiyə.
- Neynirsən?
- Neçə saatdı azmışam, qoy yolu soruşum.




digər lətifələr
ARXİV
FACEBOOK