İkicə ay əvvəl Prezidenti bu qədər tanımırdıq. Düz sözümdü. Şəxsən tanıyanlardan çox xoş sözlər eşitsək də toplum Birincini belə bilmirdi. Son iki ay bizimçün taleyüklü hadisələr yaşandı. Ali baş komandan saatbasaat aramızda oldu. Gördük eynən özümüz kimidir. Bizi qəzəbləndirən şeylər onu beşqat artıq qəzəbləndirir, xoş günümüzə tam bizim kimi fərəhlənir. Mizan-tərəzisi, ədalət hissi, məntiqi, yumoru da yüksək səviyyədə.
Sözüm ifaçılaradır. Bax indi fürsətcillik eləyib ALİ BAŞ KOMANDAN ya nə bilim İLHAM İLHAM deyib bağıra-bağıra yaltaq mahnılar oxuyursunuz ha, bilin ki İlham Əliyevin bu mədhiyyələrə qətiyyən ehtiyacı yoxdur. O ağlın, o qabiliyyətin sahibi əndazənin nə olduğunu yaxşı bilər. Eşitsə, yüz faiz ürəyi bulanacaq. İyrənəcək. Etməyin. Adamı peşman etməyin. O, səmimi adamdı. Yaltaqlardan zəhləsi gedir - əminəm. Zəhləsini tökməyin. Qoyun qalibiyyətin zövqünü yaşasın əfəndi-əfəndi. Fonu eybəcərləşdirirsiniz axı. Kirimiş durun.
