adalet.az header logo
  • Bakı 12°C
  • USD 1.7
21 Noyabr 2020 19:20
21249
DÜNYA
A- A+

Dəmir Muxetdinov: “Qarabağda 67 məsciddən 63-ü dağıdılıb, yüzlərlə tarixi abidə zədələnib”

Mədəniyyət xadimlərinin irsi abidələrinin qorunub saxlanmasında dini ayrı-seçkilik etməsi məni heyrətləndirdi.

Bu barədə Rusiya Federasiyası Müsəlmanlarının Ruhani İdarəsi sədrinin birinci müavini Dəmir Muxetdinov Rusiyanın tanınmış mədəniyyət xadimlərinin Qarabağdakı abidələrin qorunub saxlanılması ilə bağlı UNESCO-ya müraciətini özünün “Facebook” səhifəsində şərh edərkən bildirib.

“Rejissorlar, dirijorlar, musiqiçilər və yaradıcı elitanın digər nümayəndələri Dağlıq Qarabağ regionundakı xristian mədəni, bədii və memarlıq irsi abidələrinin qorunub saxlanması üçün onların Dünya İrs Siyahısına daxil olunmasını xahiş edirlər. Mədəniyyət xadimlərinin ayrı-seçkilik etməsi məni heyrətləndirdi: Onlar müsəlman abidələrinin təhqir olunmasına və məhv edilməsinə utanıb qızarmadan göz yummaqla açıq-aydın göstərirlər ki, qorunub saxlanması zəruri olan mədəni sərvət yalnız Dağlıq Qarabağdakı xristian məbədləridir”. 

Dəmir Muxetdinov  Dağlıq Qarabağın işğal olunmuş ərazilərində separatçı rejimin dövründə onilliklər ərzində 67 məsciddən 63-nün dağıdıldığını, yüzlərlə tarixi və mədəni abidələrin zədələndiyini vurğulayıb. 

O, həmçinin Qarabağda onlarla, yüzlərlə müsəlman mədəni abidələrinin dağıdılmasına tam etinasızlıq göstərildiyi halda Alban-udi kilsəsi tərəfindən əslində kimə mənsub olması mübahisə doğuran məbədlərin dağıdıla biləcəyinə eyhamları vicdansızlıq adlandırarıb.

“Hər bir müşahidəçi bu məsələyə obyektiv yanaşarsa, o qeyd etməlidir ki, Azərbaycan multikultural dövlət kimi özünü apararaq bütün dini ənənələrə eyni dərəcədə hörmətlə yanaşır. Bakı - dəfələrlə dünya dini liderlərinin zirvə görüşlərinin paytaxtı olub. Əgər indiki Azərbaycan rəhbərliyi xristianlığa layiqincə münasibət göstərməsəydi patriarx Kirill yəqin ki, Prezident İlham Əliyevlə və Qafqaz Müsəlmanları İdarəsinin rəhbəri şeyxülislam Allahşükür Paşazadə ilə müntəzəm görüşməzdi”.

Dəmir Muxetdinov bununla belə, Qarabağın tarixi irsinə UNESCO-nun diqqətinin cəlb edilməsi faktının özünü tamamilə düzgün hesab etdiyini vurğulayıb.

“Ümidvaram və inanıram ki, yaxın vaxtlarda 75 illiyini qeyd etmiş bu nüfuzlu beynəlxalq təşkilatın mütəxəssislərinin savadı və mədəniyyəti regionun tarixi irsinin bundan sonra qorunması üçün müvafiq ekspertizaya başlamaq və obyektlərin dini mənsubluğundan asılı olmayaraq obyektiv və qərəzsiz qərarlar qəbul etmək üçün kifayət edəcək”, - deyə RF Müsəlmanlarının Ruhani İdarəsi sədrinin müavini sözlərini yekunlaşdırıb.