Film izle hacklink kiralık bahis sitesi satılık bahis sitesi Adalet.az | Pampaq adamın gündəliyi Adalet.az | Pampaq adamın gündəliyi Adalet.az | Ədalət -
ANA SƏHİFƏ / ƏDƏBİYYAT

Pampaq adamın gündəliyi

(esse)

7236    |   2018-10-05 17:15
Şriftin ölçüsü:
A+ Böyütmək
A+ Balacalaşdır

Hamı onu ələ salırdı. Qəhqəhə ilə müşahidə olunan zarafatlar onun gündəlik həyatının bir hissəsi idi. Belə demək mümkünsə ayrılmaz bir hissəsi idi. Bu hissələrin ən yaddaqalanlarını, fəlsəfi yük daşıyanlarını xüsusi həvəs və zövqlə öz dəftərçəsinə qeyd etmək pampağın sevdiyi işlərdən idi. Hər gün dayancaqda, metroda, piyada keçidində, işdə, hətta jekdə də onu ələ salırdılar. Natamamlıq kompleksini özündə hiss etdikcə, bu haqda yazılan fikirləri, məqalələri oxuyur, oxuduqca bədbinləşir, yekun və qəti bir nəticəyə gəlib çıxa bilmirdi. Hər müəllif də məsələyə ayrı cür yanaşır, tamam fərqli baxışları ortaya qoyurdular.

Bir gün maaş köçürən Tahir dayı onu görüb var gücü ilə qışqırmağa başladı. Əcaib səslər çıxarandan sonra hırıldayıb: "Ayə, pampaq! Bu gün maaşını alarsan, sənə yardım da yazmışam a qıvlasız!” Tahir dayı çox kefcil adam idi, qarnı böyük qlobusu xatırladırdı, ixtisasca baytar olsa da, idarənin baş mühasibi işləyirdi. Bütün günü içki məclislərində mənasız sağlıqlar müəllifi olmaqdan yorulmurdu. Dostları ona "Rumka Tahir” deyirdilər. İndi hardansa ağlına gəlib ki, pampağın yardıma ehtiyacı var... Pampaq donmuş halda, qorxa-qorxa başını tərpədib ehmalca gülümsədi. Dişləri qarğıdalı dənələri kimi sıra ilə düzülmüşdü. Elə bil süd dişləri hələ tökülməyib. Pampağın işi həm vacib, həm də ağır idi. İdarəyə gələn yüklərin boşaldılmasına və aidiyyatı üzrə yerləşdirilməsinə cavabdeh idi. Bir dəfə yoxlama vaxtı ona 1945-ci ilin qaz peçlərinə maddi məsul şəxs kimi qol çəkdirmişdilər. Heç onda pampağın atası da dünyaya gəlməmişdi. Bu işi ona kim tapşırmışdısa adama elə gəlirdi ki, pampaqla məzə vurmaq istəyibmiş. İnsafən pampaq işinin ustası idi. İşində çəyirtkə kimi cəld idi. Baxmayaraq ki, həyat yolunda tısbağa kimi ləng və astagəl təəssüratını bağışlayırdı. Qadınlarla bağlı isə lap tənbəlin yekəsi idi. Qırx yaşına çatsa da bir xanıma göy gözünün ucu ilə də baxmamışdı. Bəlkə də nə vaxtsa baxıb, amma hələ onu bir xanıma baxan yerdə görən olmamışdı.

Nahar fasiləsində pampağın dəyişməz menyusu var idi: "İki yumurta, bir az pendir, yanında da soğan.” Elə iştahla yeyirdi ki, elə bil dünyanın ən ləziz nemətini nuş eləyirdi. Sonra uzun zaman fikrə gedirdi. Fikirlər onu köhlən at kimi çapırdı. İçində boy verən dalğalar gözlərinin ağında görünürdü. Axşamlar Fixtenin, Feyerbaxın, Kantın fəlsəfi fikirlərini oxumadan yatmazdı, yatmaq

istəsə də gözünə yuxu getməzdi. Şopenin musiqilərini ana laylası qədər əziz bilir, Dalinin bir rəsmini isə yatağının başına vurmuşdu. O vaxt məktəb kitabxanasında işləyən Flora bibisi Dalinin rəsm əsərini pampağa hədiyyə eləmişdi. Düzdü, rəsm əsəri papmaq üçün anlaşılmaz və naməlum görünmüşdü, amma sonralar bu rəsm əsərini xatirə kimi yatağının baş ucundan asmışdı.

Cümə günü azan səsinə oyanan şəhərin sakinlərinin üzündə qəribə bir təbəssüm, naməlum bir sevinc var idi. Pampaq öz qeydlərini üç cümlə və bir bənd şeirlə bitirmişdi: "Yazmaq istəyirəm, yox yaşamaq istəyirəm, əslində isə...”

Hamı çıxıb gedəndə,

Məni yola salanda...

Sərxoş buludların

Altında xoşbəxtliyim

Bir də ki ümidlərim

Sizə "salam” deyəcək...

Hava qaralırdı. Pampaq morqda işləyən mürdəşirin soyuq baxışları ilə qarşı-qarşıya qalmışdı. Saatın çaqqıldısı qulaq deşirdi.

Sabah hamı maaş alacaq, Tahir dayı yenə sağlıqlar deyəcək, amma bir də pampaq adamın yerinə lağa qoyulmaq üçün namizəd tapılmayacaq...

Tural Cəfərli




İmza:
SON XƏBƏRLƏR
2019-09-16


VİDEO



ƏDALƏT BU GÜN
Redaktor seçimi
FOTOREPORTAJ
GÜNÜN SİTATI
SORĞU
Məktəbli formalarının qiymətlərindən razısınızmı?

Hə (25%)
Yox (75%)

ÇOX OXUNAN
GÜNÜN LƏTİFƏSİ

Vaxtilə ölkənin baş antisemiti Mixail Andreyeviç Suslov danışdığı bu anektoda hələ də gülürük.

Sovetin vaxtı.

Bulvara bir çəllək kvas gətirirlər. Satıcı onu qoşqudan açıb satmağa hazırlaşır.

Bir nəfər yaxınlaşır:

-Çəlləyin hamısının qiyməti nə edir?

-Özün hesabla: iki yüz litr, hər bardağı da 30 qəpikdən. Yüz iyirmi manat.

-Al, bu da sənin pulun, get gəz, kef elə. Axşam gəlib boş çəlləyi götürərsən.

-Yaxşı!

Satıcı çıxıb gedir. Kişi plakat açır: "Kvas pulsuzdur”.

Camaat əvvəlcə təəccüblənir. Sonra yavaş-yavaş yaxınlaşır. Sonra növbə, sonra uzun növbə, daha sonra əsl izdiham. Söyüş, hay-həşir. Kimi növbəsiz soxulur, kiminə çatmır. Dava, mərəkə, bıçaqlaşma.

Milis gəlib, izdihamı dağıdır. Təhrikçilərisə qoduqluğa.

Kişini də aparırlar.

Sıxma-boğmaya salırlar.

-Dava salmaqda məqsədin nə idi?

-Qətiyyən belə bir məqsədim yox idi!

-Qeyri-qanuni ticarətlə məşğulsan?

-Camaata havayı kvas paylayırsan. Şahidlər var.

-Deməli oğurlamısan!

-Öz pulumla almışam. İxtiyarım çatır.

-Bəlkə dəlisən?

-Normal adamam. Arayışım var.

-Yaxşı, başa düşdük, biz səni buraxırıq. Ancaq, de görüm, niyə bunu edirdin? Niyə öz pulunu göyə sovurursan? Niyyətin nədir?

- Yaxşı, qoy deyim. Mən artıq yaşlı adamam. Dəqiq bilirəm ki, kommunizmə kimi yaşaya bilməyəcəm. Ancaq çox istəyirdim ki, kommunizmin necə olacağını öz gözlərimlə görüm...

Kommunizmdə...





digər lətifələr
ARXİV
FACEBOOK