BƏS, BİZ KOROĞLUYDUQ, BABƏKDİK?
Deməli, türk babalarımız öz qılıncları ilə dünyanın yarısını tutmuşdular. O vaxt hələ Amerika kəşf olunmamışdı, yoxsa Amerikaya da qılınclarını sancardılar.
Hərçənd ki, alimlərin fikrincə, Amerikanı da ilk dəfə Sibirdən (bizim eradan 4000 il əvvəl, bəzi mənbələrdə 10000 il əvvəl) Berinq boğazından keçərək Amerikanı yenə bizim babalarımız fəth edib.
Amma türk xalqlarının içində qılınc oynatmaya görə bu günədək nə bir dünya, nə də bir Olimpiya çempionu var. Çempionlar bizim babaların qılıncının qabağında zar-zar əsənlərin nəslidi.
Yenə də az qala 1 kilometrə ox atan babalarımız, quşu gözündən vuran babalarımız öz oxçuları ilə dünyaya meydan oxuyurdu. Amma bu gün oxatma üzrə nə bir dünya çempionumuz, nə də bir Olimpiya çempionumuz var.
Ən böyük faciənin biri də bilirsiniz nədi? Azərbaycanın təxminən dənizlə 600 km.-dən artıq, Türkiyənin isə dənizlə təxminən 4.500 km. sərhədi var. Eləcə də Türkmənistanın və Qazaxıstanın dənizlə bir 800 km. sərhədi var, amma bugünədək üzgüçülük və avarçəkmə üzrə nə bir dünya çempionumuz, nə də bir Olimpiya çempionumuz var.
Kolumb birinci türk sultanının yanına gəlib, deyib mənə kömək elə, sənə yeni bir dünya bəxş edim. Başı 200-dən çox arvadına qarışmış türk sültanı da deyib ki, ə, rədd ol burdan, get öz işinlə məşğul ol. O də rədd olub.
Belə-belə işlər, dostlar.