Düz 30 il! Bir igidin ömründən də artıq! Şəhidlərimizin yaşına diqqət edin, əksəriyyəti nəinki 30 yaşını, heç 25 yaşını da görməyib.
Düz 30 il! Ermənistan silahlı qüvvələri Azəbaycanın 20 min kv.km. ərazisini işğal altında saxladı. Şəhər və kəndlərimizi viran, ana-bacılarımızı, körpələrimizi gözü yaşlı qoydu. Bu boyda dünyada bir it oğlu da çıxıb demədi ki, niyə BMT-nin və dünya ölkələrinin tanıdığı Azərbaycan sərhədlərini pozub bu qədər ərazini işğal etmisiz. Düzdür, Birləşmiş Millətlər Çayxanası 4 qətnamə çıxartdı ki, Ermənistan silahlı qüvvələri işğal elədikləri ərazidən qeyd-şərtsiz çıxsın. Amma Ermənistan həmin qətnamələri atdı zibilliyə. Nə BMT, nə də dünya dövlətləri buna bir reaksiya vermədi. Amma BMT qərar verməmiş o illərdə ABŞ Serbiyanı bombaladı, sonra da həmin ölkənin prezidentini tutub həbsxanada öldürdülər. Bizə gələndə isə BMT də, ABŞ da susdu.
88-ci ildə Ermənistan bu ölkədə yaşayan azərbaycanlıların qıra bildiklərini qırdı, qıra bilmədiklərini silah gücünə ölkədən çıxarıb qovdu. İndi Ermənistanda bir azərbaycanlı da yaşamır. BMT, ABŞ və dünya dövlətləri yenə susdu.
Susmaqları cəhənnəm, ABŞ bizə 907 sanksiyasını tətbiq etdi, amma işğalçı Ermənistana və Qarabağdakı separatçı rejimə milyardlarla dollar yardım etdi və yardım etməkdə də davam edir.
Nə isə, sizi yormayım. İndi də 10 noyabr Bəyannaməsinin imzalanmasına baxmayaraq, bu günədək həmin Bəyannamədəki özünün qəbul etdiyi heç bir şərtə əməl etmir, həm sərhəd boyu bizim kəndləri, postları, əsgərlərimizi demək olar ki, hər gün ətəşə tutur, həm də Qarabağdan bu günədək çıxarmadığı silahlı quldurları tez-tez bizim postlarımıza və əsgərlərimizə hücum edir.
Bəyannamədən iki il keçməsinə baxmayaraq, hələ də sərhədlərin müəyyənləşməsinə imkan yaratmır.
Bu ayın 12-14 arasında da bütün sərhəd boyu iriçaplı silahlardan, artilleriyadan, minaatanlardan istifadə etməklə genişmiqyaslı hücuma keçiblər. Nəticədə 80 nəfər Azərbaycanın əsgər və zabiti şəhid olub, 250 nəfərə qədər əsgər və zabitimiz yaralanıb. Buna cavab olaraq Müdafiə Nazirliyi Ermənistanın atəş nöqtələrini susdurmaq məcburiyyətində qalıb və atəş nöqtələrinin yerləşdiyi yüksəklikləri əsgər və zabitlərimizin qanı bahasına Ermənistan ordusundan təmizləyib.
İndi 30 il Ermənistanın işğalına susan dünya yerindən qopur ki, Azərbaycan Ermənistanın ərazisinə təcavüz edir. ABŞ-ın Nümayəndələr Palatasının spikeri 82 yaşlı Nensi Pelosi, Trampın «ifritə» adlandırdığı Nensi Pelosi cibinə üç-dörd dəsmal qoyub gəlib İrəvana, göz yaşı tökür və Azərbaycanı təcavüzkar adlandırır. Məsələni Konqresdə, BMT-də qaldıracağını söyləyir və deyir ki, Azərbaycanı təcavüzkar bir dövlət kimi tanıtmağı həmin təşkilatlarda qəbul etdirəcək. Bir sözlə, hamının adından danışır. Halbuki demokratik bir ölkədə yaşadığını unudub.
Bizimkilər də bərk dilxor olublar, məsələni şişirdirlər. Ay dostlar, bu qadını Amerikada heç filan yerinə də alan yoxdu. Bizim palatka toylarındakı tamadalar palata spikerindən hörmətlidi. Qoca arvaddı da, boş verin getsin.
Nə isə. Canı cəhənnəmə. 30 il 907 tətbiq edib nə qələt ediblər ki, indi də bilmirəm nəsə 908, 909 və s. tətbiq edib nə qələt eliyələr.
Amma başqa bir məsələ də var ki, sapı özümüzdən olan baltaları, Sevinc Osmanqızını Youtube kanallarına yığıb Azərbaycanın Ermənistana təcavüz etdiyini bar-bar bağırırlar. Onların məqsədi aydındır, amma sosial şəbəkələrdə onlara səs verən soydaşlarımızı heç cür başa düşə bilmirik. Yəni Sevinc Osmanqızının da, başına yığdıqlarının da məlumdur ki, çörəyi bizi söyməkdən çıxır. Bəs, içimizdəki soydaşlarımız? Güman ki, onları da ABŞ, Fransa, nə bilim hansı kərtənkələ maliyyələşdirir.
Maksim Qalkin Rusiya-Ukrayna müharibəsində Rusiyanın yanında olmadığı üçün dövlət onu casus adlandırdı, vətən xaini adlandırdı. Bizdəki casuslar haqqında da düşünmək pis olmazdı. Bu casuslar həm xalqın döyüş ruhunu sındırmağa çalışır, həm də şəhidlərimizin ruhunu alçaldırlar. Şəhidin qardaşını ekrana çıxarıb üzr istətmək çox asandır, əsas məsələ bu casusları tapıb üzə çıxarmaq, özü də üzr istətmək yox, cinayət məsuliyyətinə cəlb etmək lazımdır.
Müharibə hələ qurtarmayıb. Müharibə onda qurtaracaq ki, Ermənistan Azərbaycanın ərazi bütövlüyünü tanıyacaq, Zəngəzur dəhlizinin açılmasına şərait yaradacaq. Əgər bu şəraiti yaratmasa Azərbaycan Ordusu özü həmin dəhlizi açacaq, istəyir ABŞ, Fransa, day nə bilim hansı kərtənkələ yaxasını cırsın, ya ayrı yerini.
Tanrı xalqımızı qorusun!
Tanrı əsgər və zabitlərimizi qorusun!
Tanrı Ali Baş Komandanımızı qorusun!