ANA SƏHİFƏ / YAZARLAR

Keçəldən bəyanat, Kosadan ultimatum

"Ya dediyinizi edin, ya da..."

50533    |   2013-03-16 11:41
Şriftin ölçüsü:
A+ Böyütmək
A+ Balacalaşdır

Novruz yavaş-yavaş gəlir. Abırlıdı da ona görə. İldə bir dəfə gəlir deyə camaat da onun xətir-hörmətini saxlayır, başına and içir. Novruz da ATƏT-in Minsk Qrupunun həmsədrləri kimi abırsız deyil ki, ildə 4-5 dəfə boş-boşuna gəlsin. Sayın Aqil Abbasın iki nömrəli düşmənləri iki-üç aydan bir əl-ələ verib gəlirlər. Heç düz-əməlli trio da oxuya bilmirlər. Hərəsinin ağzından bir avaz gəlir, biri ingiliscə, biri rusca oxuyur. Üçüncüsü də fransız dilində nəsə zümzümə edir. Bakının tıxaclı küçələrində bir neçə gün dolaşıb əlləri zadlarından uzun-ətəklərindən uzun qayıdırlar geri. Onlarda abır nə gəzir? Özlərini də elə aparırlar ki, guya torpaqlarımızın qədrini bizdən çox bilirlər. Torpağımızın hər sotuna filan qədər qiymət qoymuşuq, bir metrinə görə qardaş qanı axıtmışıq, əmioğlu güllələmişik. Siz gedin öz dərdinizi çəkin.
Novruzu onlarla tay tutmaq heç insafdan deyil. İldə bir dəfə gəlib hamıya bayram ovqatı bəxş edir. Hər tərəfdə bir canlanma yaranır. Səməni cücərdən, yumurta boyayan kim. Şəkərbura, paxlava bişirmək də öz yerində. Tonqaldan tullanmaq üstə uzun bir növbə yaranır. Hamı çalışır ki, həyət-bacada təmizlik işləri aparsın.
Novruzun gəlişi ən çox da Keçəlin və Kosanın işinə yarayır. Bu ərəfədə əməllicə hörmətə minirlər. Ay orda oturma, burda otur, ay nə bilim yuxarı başa keç, pəncərəyə yaxın oturma, soyuq dəyər...
Ona görə də Keçəllə Kosa özlərini dağ başına qoyublar, hökumət dili ilə desək, vəzifə səlahiyyətlərindən sui-istifadəyə yol veriblər. Guya bizimkiləri tanımırsız, kimin üzünə bir-iki dəfə baxırsan, özünü göylərdə hiss edir, deyir ki, burda mənəm, Ağ Evdə Obama.
Görün dünyanın harasıdı ki, Keçəl də bəyanat verib, guya bunun da partiyası-filanı var.
Hələ bizi borclu da çıxarmaq istəyib. Deyib ki, Novruz gedir-getsin, özü bilər, mən bu il Azərbaycan tərəfə getmək barədə fikirləşmirəm. Guya bizdən eyni sözləri eşitdiyinə görə bezib. Keçəlin sözləri düzgün çatdırılsın deyə onun bəyanatından sitatı olduğu kimi verirəm: "Artıq neçə illərdi ki, eyni şey təkrarlanır. Hər dəfə deyirsiniz ki, inşallah gələn il Novruzu erməni işğalından azad olunan torpaqlarımızda keçirəcəyik. Mən də sizə inanıb gəlirəm, amma görürəm ki... Nə qədər olar axı, ya bu məsələni birdəfəlik həll edin, ya da məni gözləməyin, gələn deyiləm". Telekanallardan maaş alan qardaşlarımız demişkən, sitatın sonu...
Kosa Keçəldən bir addım da irəli gedib, götürüb ultimatum verib. Özü də Kosanın ultimatumundan kabab iyi gəlir. Bu da Kosadan sitat: "Hərdən mənə elə gəlir ki, sizin Cıdır düzündə, İsa bulağında kabab yeməkdən başqa arzu, istəyiniz yoxdu. Kimi dindirirsən deyir ki, Şuşanı ermənidən geri alan kimi Cıdır düzündə kabab çəkəcəm, İsa bulağında qonaqlıq verəcəm. Qardaş, nə vaxt e, nə vaxt? Mədəm şirə buraxdı axı... Gedin, alın, bişirin, mənim də ağzım dada gəlsin. Gedib, alıb, bişirə bilmirsinizsə, məni narahat eləməyin". Bu yerdə lap sitatın sonu...
Allah yenə Novruzdan razı olsun. Sakit-sakit, abırlı şəkildə gəlməkdədi. Yoxsa bu Keçəllə Kosa kimi? Biri bəyanat verir, o biri ultimatum göndərir. Bizimlə bəyanat dilində, ultimatum tonunda danışmaq olmaz. Belələrini çox görmüşük. Guya İctimai Televiziya yox idi, səhər açılmırdı?
Səbrimizi daşırmayın, vallah elə eləyərik oynaya-oynaya gələrsiz, özü də Novruzdan bir neçə gün qabaq. Bəyanat verənə, ultimatum göndərənə bir bax. Sizi öyrədənlərə arxayın olmayın, onlarla da danışmağa gücümüz yetər. Sadəcə, indi başımız qarışıqdır, Novruzu qarşılamalı, ona ümid verməliyik. "Gələn il sizi işğaldan azad olunan torpaqlarda qarşılayacağıq" kimi sözlər yəni. Novruzu qarşılayıb yola salandan sonra Keçəl və Kosa ilə məşğul olarıq.
Telekanallardan maaş alan qardaşlarımız demişkən, lap ən son məlumata görə, Novruz yavaş-yavaş, abırlı şəkildə gəlməkdədi. Amma heç bilmirəm Keçəl və Kosa sözlərini tuta biləcəklərmi...
Etibar Cəbrayıloğlu


İmza:

YAZARIN ARXİVİ

2017-12-02 : Onun adı Rey
2016-09-30 : ...Sadə Qabil
2016-08-13 : Poeziya, Salam
2016-08-12 : Poeziya, Salam
2016-06-11 : Təhsil elçisi
2015-10-09 : Qadağaya qadağa
2015-08-29 : Birinci 10 il
2015-04-11 : Təzə Ağdamlı
2015-03-20 : Bizim Corc
2014-12-13 : "Kitayski" çex
2014-04-05 : Abini anarkən...
2014-01-11 : Əfsanə bolluğu
2013-12-28 : Sonuncu alman
2013-11-30 : Nə sözün?
2012-08-09 : Gedin və baxın!
2012-05-30 : Məqsədli yazı
2011-08-27 : A+A+A
2011-01-08 : Hamı telekanala!
2010-10-02 : Al bıçağı...
2010-06-19 : Top, tar və...
2009-12-12 : 2012
2009-06-20 : YILMAZ, BU KİM?
2009-03-20 : DAVALI YORĞAN
2008-05-24 : Nazirlər soyunur
2008-04-26 : Qalxa-qalxa gedir
2008-03-30 : Tərcümeyi-hal
2008-03-01 : Mənə "beş" ver
2007-11-10 : Reklamlı yazı
SON XƏBƏRLƏR
2018-01-16
2018-01-15


VİDEO



ƏDALƏT BU GÜN
Redaktor seçimi
FOTOREPORTAJ
GÜNÜN SİTATI
SORĞU
Təbii qaz limitini keçmisinizmi?

Hə (71.43%)
Yox (28.57%)

ÇOX OXUNAN
GÜNÜN LƏTİFƏSİ
Maarif Soltanın İsmayıllıdakı kənddəki evinə bir sarsaq pişik dadanıbmış, şairi yığıbmış boğaza. Aparıb pişiyi meşədə azdırır, gəlir görür ki, pişik evdədi. Aparıb bir az uzaqda azdırır, gəlir görür ki, yenə ondan qabaq gəlib, evdədi. Aparıb "Qız qalası" tərəfdə meşədə azdırır, yenə qayıdıb görür ki, ondan qabaq gəlib.
Axırda hirslənib aparır Babadağının ən ucqar bir yerində azdırır. Bir neçə saatdan sonra xanımına zəng edir:
- Pişik gəlib çıxıb?
- Hə.
- Ver telefonu pişik oğlu pişiyə.
- Neynirsən?
- Neçə saatdı azmışam, qoy yolu soruşum.




digər lətifələr
ARXİV
FACEBOOK