Ağdam işğaldan azad olunandan sonra şəhərə birinci dəfə girəndə ilk olaraq Pənah xanın məzarını ziyarət elədim, sərdabəsini öpdüm. Və yalvardım ki, qəbrini qoruya bilmədiyimə görə məni bağışla (bizi yox, məni. Mən bizə cavabdeh deyiləm, özümə cavabdehəm). Amma bağışladığına inanmadım. Sonra məscidə getdim, şəhidlərimizin ruhuna bir «Fatihə» verdim və ordan da birbaşa getdim evimizə, həyətimizə. Həyətə girəndə də yerdən bir çimdik torpaq götürüb yedim, dedim görüm dadı qaçmayıb ki? Dadı qaçmamışdı. Yəqin ki, torpaq da mənim dadımı hiss elədi, amma deyəsən mənim dadım qaçmışdı.
İnsan doğulduğu torpağa oxşadığı kimi, torpaq da doğduğu insanlara oxşayır, mayaları birdi. Öz mayasından olan, üstündə iməkləyən, qaçan, sonra at oynadan və ən nəhayət, köksünə aldığı insanla nəfəs alır. Mən bu hissləri Ağdamda da yaşadım və daha çox Şuşada – Cıdır düzündə də yaşadım.
Cıdır düzündə gördüyüm mənzərə məni dəhşətə gətirdi. Qışda Cıdır düzündə qarı təmizləyirdin, altında yamyaşıl ot olardı. Mən Cıdır düzündə olanda gül-gülü, bülbül-bülbülü çağıran zaman idi, amma nə gül gördüm, nə bülbül səsi eşitdim. Torpaq cadar-cadar, şırım-şırım idi. Elə bil 30 il burda nə bahar olmuşdu, nə yay, nə payız, 30 il burda qış olmuşdu. Cıdır düzündə də bir çimdik torpaq götürüb yedim, dadı qaçmışdı. Pənah xanın at çapdığı, şənliklər təşkil etdiyi, Məmməd bəy Cavanşir Batmanqılıncın qılınc oynatdığı, Vaqifin, Natəvanın vəsf elədiyi, bütövlükdə Üzeyir Hacıbəyovun musiqisinə, Bülbülün səsinə, Sadıqcanın tarının pərdəsinə çökən Cıdır düzündən bir əsər-əlamət yox idi. Mənə elə gəldi ki, Cıdır düzü balacalaşıb və həm də vəhşiləşib.
Məmməd Araz bir şeirində deyir:
Dağlar məni tanımadı,
Yəqin dağlar küsüb məndən…
İndi Cıdır düzü məni tanımadı. Təkcə məni yox, 30 ildi həsrətini çəkdiyi əzizləri gəlmişdi, heç kimi tanımadı. Heç Fərhad Bədəlbəylini də tanımadı, ondakı məni ola. Yəqin küsmüşdü bizdən. Haqlıydı.
İstədim bağıram ki, mən Pənah xandan, İbrahim xandan, Məmməd bəy Cavanşir Batmanqılıncdan, Qacardan yazan oğlanam, bağıra bilmədim. Qorxdum deyə ki, ay uşaq, get bir az o yanda oyna, necə ki otuz ildi oynayırsan.
Gərək ki, 87-ci il idi. Məşhur tədqiqatçı-jurnalist Vasif Quliyevin Malıbəylidəki toyuna Bakıdan və kənar rayonlardan gəlmiş dostları götürüb çıxmışdım Cıdır düzünə. Gözəl də bir süfrə açmışdım. Dostum Mehman Cavadoğlu mənə söz atdı ki, düzdü də, buranı niyə müqəddəs sayırsınız. Söz məni tutdu, incidim. Və «Cıdır düzü niyə müqəddəsdir» əsəbi halda həm Mehmana, həm də ilk dəfə Cıdır düzünə gələn dostlara izah eləməyə başladım. Pənah xandan, Batmanqılıncdan, Vaqifdən, Natəvandan, Üzeyir Hacıbəyovdan, Mirmövsüm Nəvvabdan, Məhəmməd ağa Müctehidzadədən, Bülbüldən, Cabbar Qaryağdıoğludan, Firudin Şuşinskidən, burda keçirilən Cıdır yarışlarından, igidlərin qız seçimindən, qızların qıyqacı baxışlarından və sair və ilaxır o qədər danışdım ki, Mehman durub boynumu qucaqladı, dedi:
- Zarafat edirdim, niyə hirslənirsən?
Amma ermənilər üçün nə Şuşa, nə də Cıdır düzü müqəddəs deyildi, çünki onlar burda iməkləməmişdilər, ayaqyalın qaçmamışdılar, at oynatmamışdılar. Mənim və bizlər kimi Cıdır düzünün torpağını dadmamışdılar. Ona görə də bu torpaqdan intiqam almışdılar, cadar-cadar, şırım-şırım eləmişdilər. Cıdır düzünün altında yatan, torpağın doğduğu kişilərin və kişi kimi qadınların qəbirlərini də dağıtmışdılar. Ölülərdən də intiqam almışdılar.
Onlar da bilirdilər ki, Vətən nə «A» hərfindən başlayır, nə «B» hərfindən, nə də sərhədlərdən. Vətən əzizlərinin yatdığı qəbiristanlıqlardan başlayır. Ona görə də həm Şuşada, həm də bütün Qarabağda birinci qəbiristanlıqları dağıtmışdılar. Hətta faşistlərin belə etmədiyi bir cinayətə əl atmışdılar.
Ağcakənddə bir erməni qəbiristanlığı var. Bu barədə yazmışam, şəkillərini də çap eləmişəm. Bir qəbir daşına da toxunmamışıq, qəbiristanlıq necə var, elə də qalır. Axırıncı qəbir də 1988-ci ildə qazılıb. Amma mən Ağdamda Qarağacı qəbiristanlığında nə anamın, nə də qardaşımın məzarını tapa bilmədim. Çünki yox idi qəbiristanlıq. Bir tərəfində taxıl əkmişdilər, bir tərəfində taxıl əkməyə hazırlaşırdılar, ağızlarını cırdıq.
Şuşaya ikinci səfərimdə yenə birinci olaraq Cıdır düzünə getdim. Torpaq öz doğduğu əzizlərini, öz doğmalarını görəndən sonra gül açıb çiçəkləmişdi. Mənlə də, bizlə də barışmışdı.
Mənim şəhid analarına həmişə bir təsəllim olub. Deyirəm ki, bir gün Qarabağa gedəndə görəcəksiniz ki, övladlarınız gül olub bitib, çiçək olub bitib, çinar ağacı olub bitib, palıd ağacı olub.
İkinci səfərimdə mən bunu gördüm. O çiçəkləri də, gülləri də əzizlədim. Sağalırdı Cıdır düzü, day cadar-cadar deyildi, şırım-şırım deyildi.
Natəvanın bağı da Paşinyanın «Yallı» getdiyi, sonra da içib sərxoş olub yatdığı bağ deyildi, «Koroğlu üverturası»nın çalındığı bağ idi, Üzeyir bəyin heykəlinin ucaldığı bağ idi. Şuşa da, Cıdır düzü də Paşinyanın xanımının yekə-yekə danışdığı Şuşa və Cıdır düzü deyildi. Heydər Əliyev Fondunun, 1-ci vitse-prezident Mehriban xanım Əliyevanın təşkilatçılığı ilə keçirilən «Xarı bülbül» festivalının musiqisinə bələnmiş Şuşa və Cıdır düzü idi.
P.S. Bu mənim Cıdır düzü haqqında yazdığım ikinci yazımdı. Birinci yazını oxumaq istəyənlər aşağıdakı linkdən tapa bilərlər.
https://adalet.az/az/writers/detail/aqil-abbasnbspcidir-duzu-niye-muqeddesdir-2021-09-28-094025