Səhər kifayət qədər yatmağınıza baxmayaraq özünüzü yorğun hiss edirsinizsə, bunun səbəbi gecə yatmazdan əvvəl etdiyiniz bəzi vərdişlər ola bilər.

Adalet.az xəbər verir ki, yuxu mütəxəssislərinin fikrincə, yatmazdan əvvəl uzun müddət telefon, planşet və ya kompüter ekranına baxmaq yuxunun keyfiyyətinə mənfi təsir göstərə bilər.

Ekranlardan yayılan mavi işıq beynin yuxuya hazırlıq prosesini poza və yuxuya getməyi çətinləşdirə bilər. Nəticədə insan gecə kifayət qədər yatdığını düşünsə də, səhər yorğun və halsız oyana bilər.

Bundan əlavə, gecə saatlarında ağır yemək, kofeinli içkilər qəbul etmək və yatmazdan əvvəl uzun müddət sosial şəbəkələrdən istifadə etmək də yuxunun keyfiyyətini aşağı sala bilər.

Mütəxəssislər yatmazdan ən azı 30-60 dəqiqə əvvəl telefon və digər elektron cihazlardan uzaq durmağı, otağı sakit və qaranlıq saxlamağı tövsiyə edirlər.

Əgər yorğunluq hissi davamlı xarakter daşıyırsa və kifayət qədər yuxuya baxmayaraq səhərlər özünüzü yaxşı hiss etmirsinizsə, bunun səbəbini müəyyənləşdirmək üçün həkimə müraciət etmək məsləhətdir.