Bakı Beynəlxalq Multikulturalizm Mərkəzinin (BBMM) icraçı direktoru Rəvan Həsənov İsraildə səfərdədir.

 İcraçı direktor səfər çərçivəsində Qüds şəhərini ziyarət edib, Qüds Yunan Pravoslav Patriarxı III Teofilosla görüşüb.

Görüş zamanı Azərbaycan Respublikasında multikulturalizm siyasətinin əsas prinsipləri, ölkədə mövcud olan dini və mədəni müxtəliflik mühiti, habelə müxtəlif dinlər arasında qarşılıqlı hörmət və dialoqun təşviqi istiqamətində görülən işlər barədə məlumat verilib. Rəvan Həsənov Azərbaycanın tarixən fərqli dinlərin və mədəniyyətlərin dinc şəraitdə birgə yaşadığı məkan olduğunu vurğulayıb.
O, Azərbaycanda xristian icmasının əsrlər boyu ölkənin ictimai və mədəni həyatının ayrılmaz tərkib hissəsi olduğunu, pravoslav, katolik və alban-udi xristian icmalarının dövlət tərəfindən qorunduğunu bildirib. Qeyd edilib ki, kilsələrin fəaliyyəti üçün hər cür şərait yaradılıb, dini abidələr bərpa olunur və xristian icması digər dini icmalarla bərabər hüquqlara malikdir.

Patriarx III Teofilos Azərbaycanda multikultural və dini tolerantlıq mühitinin, o cümlədən xristian irsinin qorunub saxlanılmasının və dövlət səviyyəsində dəstəklənməsinin yüksək qiymətləndirildiyini qeyd edib, dinlərarası dialoqun möhkəmləndirilməsinin müasir dünyada xüsusi əhəmiyyət daşıdığını vurğulayıb.

Görüşdə qarşılıqlı əməkdaşlıq imkanları, mədəniyyətlərarası və dinlərarası dialoqun inkişafı istiqamətində fikir mübadiləsi aparılıb.