Cənubi Koreyada 1904-cü ildən bəri aparılan meteoroloji müşahidələr tarixində ən yüksək hava temperaturu qeydə alınıb.

Ölkənin cənub-şərqində yerləşən Yanqsan şəhərində termometrlər 42,5 dərəcə selsi göstərib.

Milli Meteorologiya Agentliyinin məlumatına görə, rekord göstərici yerli vaxtla saat 13:26-da (Bakı vaxtı ilə 08:26) qeydə alınıb. Yanqsan şəhəri Busan limanının yaxınlığında yerləşir.

Bundan əvvəl, iyulun ortalarında ölkədə tarixdə ilk dəfə ən yüksək səviyyəli meteoroloji xəbərdarlıq elan olunmuşdu. Agentliyin rəhbəri Li Mi Son bildirmişdi ki, bu xəbərdarlıq sistemi tətbiq ediləndən bəri ilk belə haldır.

Onun sözlərinə görə, xəbərdarlıq hətta sağlam insanların belə istiliklə əlaqəli xəstəliklər və ölüm riski ilə üzləşə biləcəyini göstərir.

Meteorologiya Agentliyinin statistikası göstərir ki, Cənubi Koreyada isti hava dalğalarının orta illik davametmə müddəti 1970-ci illərdəki 8 gündən son beş ildə 19 günə qədər artıb. Ölkədə maksimum temperaturun 33 dərəcə və ya daha yüksək olduğu günlər "isti hava dalğası" kimi qeydə alınır.