ABŞ Silahlı Qüvvələri 1 sentyabrda İranın hərbi hədəflərinə, hava hücumundan müdafiə obyektlərinə, radiolakasiya sistemlərinə və rabitə məntəqələrinə zərbələr endirərək hücumları başa çatdırıb.

Adalet.az-ın məlumatına görə, bu barədə ABŞ Silahlı Qüvvələrinin Mərkəzi Komandanlığı (CENTCOM) bildirib.

"CENTCOM qüvvələri 1 sentyabrda İranın hərbi hədəflərinə zərbələri uğurla başa çatdırıb. ABŞ Silahlı Qüvvələri hava hücumundan müdafiə obyektləri, radarlar, dəniz vasitələri və obyektləri, minaların quraşdırılma vasitələri və rabitə qurğuları da daxil olmaqla, SEPAH (İslam İnqilabı Keşikçiləri Korpusu - Silahlı Qüvvələrin elit bölməsi - red.) hədəflərinə hücum edib", - komandanlığın açıqlamasında bildirilir.

CENTCOM bildirib ki, zərbələr SEPAH-ın Hörmüz boğazında ticarət gəmilərinə və bölgədəki ABŞ hərbi qulluqçularına hücum cəhdlərindən sonra baş verib.

01 sentyabr, 20:55

ABŞ Silahlı Qüvvələri bu gün Hörmüz boğazında İran obyektlərinə kütləvi zərbələr endirməyə başlayıb.

Adalet.az xəbər verir ki, bu barədə ABŞ Silahlı Qüvvələrinin Mərkəzi Komandanlığının (CENTCOM) "X" sosial şəbəkəsindəki bəyanatında bildirilib.

"Bu gün Şərq vaxtı ilə saat 12:00-da ABŞ Silahlı Qüvvələri İranda İslam İnqilabı Keşikçiləri Korpusunun (SEPAH) obyektlərinə zərbələr endirməyə başlayıb. Zərbələr SEPAH tərəfindən Hörmüz boğazındakı kommersiya gəmiçiliyinə və regionda yerləşdirilmiş Amerika hərbçilərinə qarşı son hücum cəhdlərinin ardınca endirilib", - bəyanatda qeyd olunub.