adalet.az header logo
  • Bakı 19°C
  • USD 1.7

BUNU DA GÜLMƏK ÜÇÜN YAZDIM - Aqil ABBAS yazır

AQİL ABBAS
775 | 2024-03-28 12:51

Rəhmətlik Molla Nəsrəddin bir dostu ilə rastlaşır, hal-əhval tuturlar. Dostu deyir ki, vəziyyətim çox ağırdı, bir otağım var, uşaq da çox, çətinlik  çəkirik. 

Molla deyir:

- Gəl sənə bir məsləhət verim. İnəyin var?

- Bəli var.

- Bu gün o inəyi də  evdə saxla.

Aradan bir  həftə keçir, yenə  rastlaşırlar. Molla soruşur ki, vəziyyət  indi nətərdi?

Dostu:

- Molla, nəfəs ala bilmirik, qırılırıq.

Molla:

- Qoyunun var?

- Hə,  üç dənə.

- Get onları da evə yığ.

Aradan bir  həftə də keçir, yenə rastlaşırlar. Molla soruşur ki, vəziyyət necədir?

Dostu:

- Molla, sən ağıllı adamsan, bu nə məsləhətdi  vermisən? Evdə yatmağa da yer yoxdur.

Molla:

- Mən nə deyirəm sən onu elə. Eşşəyin var? 

- Hə, get onu da evə gətir. 

Yenə bir  həftə keçir, yenə rastlaşırlar. Dostu deyir ki, ay molla, öldük axı.

Molla:

- Get inəyi  çıxart.

Aradan bir  həftə keçir, yenə  rastlaşırlar. Molla soruşur ki, vəziyyət necədir?

Dostu:

- Bir az rahatlaşmışıq. 

- Get qoyunları da çıxart.

Yenə aradan bir həftə keçir, rastlaşırlar, Molla soruşur ki, indi vəziyyət  nətərdi?

Dostu:

- Allah balanı saxlasın, vəziyyət xeylaq yaxşılaşıb.

Molla:

- Get eşşəyi də çıxart.

Bir həftə sonra yenə rastlaşırlar. Molla soruşur ki, indi nətərsiniz?

Dostu:

- Allah balalarını saxlasın, sən doğrudan da  müdrik kişisən. Evimizdə gen-bolluqdu, kefdəyik, hələ axşamlar  çalıb oynayırıq da.
Şəhərimizdə tıxac əlindən nəfəs almaq mümkün deyil. Adamlar tıxacda tanış olur, gənclər  tıxacda sevişir, tıxacda  üzük təqdim edir, bircə qalır  tıxacda toy eləmək. Tıxacdan  boğulurduq, indi küçələrdə avtobus  xətti də çəkiblər, lap Mollanın dostunun gününə  düşmüşük. Bu azmış kimi velosipedçilər üçün də (hərçənd ki hələ həmin yolda velosiped  sürən  görməmişəm) ayrıca yol ayırıblar. Yenə Mollanın dostunun ikinci  vəziyyətinə  düşmüşük.
Qalıb  eşşək məsələsi. İndi də deyirlər Bakıda  tramvay çəkəcəklər, ondan sonra lap kef edəcəyik.
Bir Molla Nəsrəddin  tapsaydıq bizim də dərdimizə əlac edərdi.

Nə isə…

Yadımdan  çıxdı ey, hələ  parkinqlərin də  qiymətini qaldırıblar, ümumiyyətlə, kefdəyik.

 

TƏQVİM / ARXİV