(Bu dünyanı sən yaratmısan, axı!)
Bütün dünyanın gözü qabağında dəhşətli bir müharibə gedir. Rusiya Ukraynada adını «Xüsusi əməliyyat» qoysa da, açıq-aydın müharibə gedir. Şəhər və kəndlər dağılır, daha dəqiq desək, Ağdamın, Füzulinin gününə salınıb. Təbii ki, Qarabağda olduğu kimi, atdıqları minalar, raketlər, top mərmiləri baxmır kim qocadı, kim uşaqdı, kim qadındı. Ermənilərin və 366-cı batalyonun 1990-94-cü illərdə bizə yaşatdıqları zülmü indi Rusiya Ukraynaya yaşadır. NATO və Avropa dövlətləri də dırnaqlarını bir-birinə sürtərək müharibənin qızışması üçün əllərindən gələni əsirgəmir. Rusiyaya sanksiyalar qoyub Putini hövsələdən çıxarır, Ukraynaya da silah-sursat yardımı edir ki, bərk durun, qorxmayın.
Hər iki ölkə məhvə məhkumdu. Rusiya qalib gəlsə də, hərçənd ki bu hələ görünmür, dalı üstə düşəcək. Ukrayna isə…
Artıq Ukrayna öz sərhədlərini aşır, Rusiyanın şəhərlərini raket atəşinə tutur.
Bu müharibədə Rusiyanın məğlubiyyəti onun imperiyasının sonu ola bilər. Yuxarıda qeyd etdiyim kimi, qələbəsi də məğlubiyyət deməkdi.
NATO hamını hədələyir ki, nəinki kim Rusiyaya meyl salsa, hətta bitərəf qalsa gözünü çıxardaram. Çin bir az atılıb düşdü, indi Şanxayı elə günə qoyublar ki, adamlar evdən çölə çörək almağa da çıxa bilmir, böyük bir limanı da bağlanıb, minlərlə yük gəmisi qalıb limanda. Artıq Çinin itirdiyi pulların miqdarı deyəsən, 1 trilyonu keçib. Yəni dünyanı böyrü üstə qoyub NATO.
Rusiya da hamını nüvə silahı ilə hədələyir. İndi yeni nüvə başlıqlı raket kəşf edib, deyəsən adı Sarmatdı, özü ilə 12 nüvə başlığı daşıyır, 12-15 dəqiqəyə də Britaniyaya çatır. Hər axşam da telekanallarda, xüsusilə Solovyovun verilişində reklam olunur ki, bunun biri ilə Böyük Britaniyanı məhv eləmək mümkündü. Cavabında da Britaniyanın baş naziri Conson deyir ki, sizdə olandan bizdə də var. Biz də Rusiyanı darmadağın edərik.
Bir sözlə, müharibəni durduran olmasa bütün dünyanı faciə gözləyir. Müharibənin durdurulmasına da nə NATO, nə də Rusiya maraqlı deyil. Hələ ki olan Rusiya və Ukrayna xalqlarına olur. Hadisələr göstərir ki, bu müharibənin durdurulmasında əsas Türkiyə maraqlıdır. NATO-nun üzvü ola-ola ABŞ-ın tripaç göstərişlərinə əməl etmir və özünün vasitəçilik missiyasından geri çəkilmir. Ən gülməlisi də odur ki, Rusiya nə yardan doyur, nə əldən qoyur. Yenə çömçə kimi Ermənistanı və Qarabağdakı separatçıları qarışdırır. Özünün şəxsiyyəti, söz sahibi olmadığı üçün Paşinyan da gündə bir söz danışır. Putin çağırıb yanına nətəhər danlayıbsa, başını itirib.
İndi də İrəvanda Təhlükəsizlik Şurasının iclasını çağırıb və iclasa Qarabağdakı separatçı qüvvələrin liderlərini də dəvət edib.
44 günlük müharibədən əvvəl belə bir iclası Xankəndində keçirtdi və Ali Baş Komandan İlham Əliyevin rəhbərliyi ilə Azərbaycan Ordusu təpəsinə necə bir Dəmir yumruq saldısa, hələ də başını tapa bilmir. Düzdür, indi qorxusundan Xankəndinə gəlməyə ürək eləmir, Xankəndindəkiləri İrəvana dəvət edir.
Belə getsə, Dəmir yumruq İrəvanda da onun təpəsini əzəcək.
İrəvanda da ara qarışıb, hər gün mitinqlər, etiraz nümayişləri… Bir sözlə, Köçəryanla Sərkisyan cütlüyünün barmaqları şeytanın barmağı kimi eşşəyin quyruğunun altındadı.
Birləşmiş Millətlər Çayxanasında çıxarılan qərarları da, qətnamələri də ermənilər necə 30 il tualet kağızı kimi istifadə elədilər, ondakı Putin ola.
Belə getsə, deyəsən, işə Allah qarışacaq. Ya dünyanı nizama salacaq, ya da birdəfəlik dünyadan və bizlərdən əlini üzəcək. Və öküzə mələkləri vasitəsilə xəbər göndərəcək ki, buynuzunu Yer kürəsinin altından çək, hara cəhənnəm olurlar-olsunlar.
Tanrım, müqəddəs Ramazan ayı xatirinə dünyanı nizama sal.
P.S. Bugünki nömrəmizdə Məmməd Arazın «Ya rəbbim, bu dünya sən quran deyil» şeirini də oxuya bilərsiniz.