“Epidemioloq xəstə ilə sıx təmasda olan bütün insanların siyahısını hazırlayır”. 

Adalet.az xəbər verir ki, bunu Sağlam radio”nun (93 FM) “Sağlam səhər” verilişində Səhiyyə Nazirliyinin Respublika Gigiyena və Epidemiologiya Mərkəzinin bölmə müdiri Səbinə Nurullayeva deyib.

Onun sözlərinə, görə bu siyahıya ailə üzvləri, yaxın qohumlar, tez-tez evə gələn qonaqlar və hətta zəruri hallarda qonşular da daxil edilir:

“Bu şəxslərin hamısının müayinədən keçməsi üçün şərait yaradılır, lazım gəldikdə onların xəstəxanaya yönləndirilməsi təmin olunur. Əgər evdə uşaqlar, yaşlı insanlar və ya immun sistemi zəif olan şəxslər varsa, epidemioloq onların daha ciddi müayinə və nəzarətə götürülməsinə xüsusi diqqət ayırır. Bundan sonra epidemioloq ocaqda dezinfeksiya tədbirlərinin keçirilməsini təşkil edir. Xəstənin öskürməsi nəticəsində çirklənmiş səthlər, qablar, yataq dəsti və istifadə etdiyi əşyalar xüsusi məhlullarla dezinfeksiya olunur. Evin necə havalandırılması, təmizlik işlərinin necə aparılması, xəstənin bəlğəmini necə toplamalı olduğu və onun ətraf mühitə düşməsinin qarşısının necə alınmalı olduğu barədə ailəyə ətraflı izah verilir. Epidemioloq həmçinin xəstəyə və ailə üzvlərinə maskadan düzgün istifadə qaydalarını öyrədir, xəstənin ayrı otaqda qalmasının vacibliyini izah edir”.

S.Nurullayeva qeyd edib ki, epidemioloqun mühüm vəzifələrindən biri də xəstənin müalicə prosesinin necə getdiyini izləməkdir:

“O, xəstənin dərmanları vaxtında qəbul edib-etmədiyini, müalicəni yarımçıq qoyub-qoymadığını nəzarətdə saxlayır. Əgər xəstənin müalicədən yayınma riski varsa, epidemioloq əlavə izahlar verir, motivasiya edir və müalicəyə davam etməsini təmin edir. O, həmçinin xəstənin vəziyyətində hər hansı dəyişiklik baş verərsə, həkimə məlumat verməli və müvafiq tədbirlərin görülməsinə yardım etməlidir. Bütün bu məlumatların toplanması və tədbirlərin həyata keçirilməsi nəticəsində epidemioloq vərəm ocağının təhlükəlilik səviyyəsini qiymətləndirir və bu barədə rəsmi hesabat hazırlayır. Əgər risk yüksəkdirsə, təkrar müayinələr, əlavə dezinfeksiya və daha ciddi nəzarət tədbirləri planlaşdırılır. Beləliklə, epidemioloqun gördüyü işlər xəstəliyin ailə daxilində və ətraf ərazilərdə yayılmasının qarşısını almaqda əsas rol oynayır”.