Bir gəncin işıqlı yolu onun təhsilindən başlayır. Təhsilsiz insanın cəmiyyətdə yüksək mövqe tutmağı demək olar ki, mümkünsüzdür. İnsan yalnız savadlı olmaqla, oxumaqla uca zirvələri fəth edə bilər.

Təhsil zəhmət istəyir. Bu günün qəhrəmanı Elmira Əlizadə də bu zəhmətə qatlaşanlar sırasındadır. O, 2006-cı ildə Bakı şəhərində anadan olub. İbtidadi təhsilini Bakıda alsa da, sonra Gəncədə, daha sonra isə Balakəndə  məktəbə gedib. Elmira öz uşaqlıq arzusunu reallaşdırmağı qarşısına məqsəd qoymuşdu. O, politoloq olmaq istəyirdi. Bunun üçün dayanmadan çalışırdı. Nəhayət ki, bu çalışqan qızcığaz arzusuna çatdı. O, 445 balla Bakı Dövlət Universitetinin Politologiya fakültəsinə qəbul oldu. Biz də onun sevincinə şərik olduq. 

Tələbə adını qazanmış Elmira uğur qazanmağın yolunu abituriyentlərlə də bölüşüb: “Sevindirici nəticə əldə etmiş tələbə kimi, bütün abituriyentlərə deyə bilərəm ki, əvvəlcə öz hədəflərini müəyyənləşdirsinlər. Daha sonra zəhmətə qatlaşmağı bacarsınlar. Son dərəcə səbrli olsunlar. Və bir də özlərinə inansınlar. İnamla çalışmaq hər kəsə uğur qapıları açır.  Belə olan halda bütün abituriyentlər arzuladıqları ali məktəbə qəbul olub, istədikləri ixtisasa yiyələnə bilərlər.”

Əntiqə Kərimzadə