Dövlət Statistika Komitəsi məlumat yayıb ki, Azərbaycanda orta aylıq maaş 1000 manatı ötdü. Sonrada yazıb ki, bu ilin yanvar-may aylarında Azərbaycan iqtisadiyyatında muzdla çalışan işçilərin orta aylıq nominal maaş əvvəlki ilin müvafiq dövrünə nisbətən 9,4% artaraq 1 003,3 manat təşkil edib: “İqtisadiyyatın mədənçıxarma sənayesi, maliyyə və sığorta fəaliyyəti, informasiya və rabitə, peşə, elmi və texniki fəaliyyət, eləcə də nəqliyyat və anbar təsərrüfatı sahələrində orta aylıq nominal əmək haqqı daha yüksək olub”.

Və dübarə qeyd edib ki, bu il iyunun 1-nə ölkə iqtisadiyyatında muzdla çalışan işçilərin sayı 1 749,4 min nəfər olub, onlardan 893,1 min nəfəri iqtisadiyyatın dövlət sektorunda, 856,3 min nəfəri isə qeyri-dövlət sektorunda fəaliyyət göstərib. Muzdla işləyənlərin 18,9%-i təhsil, 18,6%-i ticarət; nəqliyyat vasitələrinin təmiri, 12,8%-i sənaye, 8,4%-i əhaliyə səhiyyə və sosial xidmətlərin göstərilməsi, 6,8%-i tikinti, 6,4%-i dövlət idarəetməsi və müdafiə; sosial təminat, 4,3%-i nəqliyyat və anbar təsərrüfatı, 3,8%-i peşə, elmi və texniki fəaliyyət, 3,3%-i kənd təsərrüfatı, meşə təsərrüfatı və balıqçılıq, 2,2%-i maliyyə və sığorta fəaliyyəti, 14,5%i- isə iqtisadiyyatın digər sahələrində məşğul olub.

P.S.Bayaqdan xəbəri oxuyuram, oxuyuram, gülürəm, sonra  gülürəm, gülürəm, bir də oxuyuram! 2021-ci ilin yanvarından 538 manat maaş alıram. Artıq 3 il 7 aydır. Allahımıza and olsun ki, üstünə 1 manat yox e, heç bir qəpik də artım olmayıb. Həyat yoldaşım da 1 ildən çoxdur ki, məktəblərin birində 380 manat maaşa fəhlə işləyir. Onun da maaşı 1 ildən də çoxdur ki, qalxmır. Çoxdan duyuq düşmüşdüm ki, Dövlət Statistika Komitəsində xəbəri kim yayırsa, hansı mətbuat katibi tərtib edirsə həddindən çox komik bir adamdı. Belə zarafat olar?
Əşşii, biz heç e, o gəlirdən 80 manat təqaüd alan veteran döyüşçülərin təqaüdünün üstünə niyə bir balaca artım gəlmir?

Əntiqə Rəşid