“Azərbaycan Cümhuriyyəti elan olunduğu (28 May 1918, Tiflis) günlərdə paytaxt Bakı bolşeviklərin, daha sonra Britaniyanın dəstəklədiyi eserlərin Sentrokaspi hökumətinin əlində idi”. 

Adalet.az xəbər verir ki, bunu professor Qulu Məhərrəmli deyib. 

“Hər iki hökumətdə erməni-rus hərbi qüvvələri aparıcı rol oynayırdı. Cümhuriyyət hökuməti və Osmanlı Türkiyəsi arasında 1918-ci il iyunun 4-də bağlanmış müqaviləyə görə Nuru paşanın komandanlığı ilə Azərbaycana köməyə gələn Qafqaz İslam Ordusu Gəncədən Bakıya doğru yürüşə başladı. Göyçay, Kürdəmir, Ucar, Səlyan, Şamaxı istiqamətində bolşevik-erməni qüvvələri ilə ağır döyüşlər aparıldı. Avqustun əvvəllırində Bakıya ilk hücum uğursuz oldu. Lakin qüvvələri səfərbər edən Azərbaycan-Türk ordusu sentyabrda yenidən hücuma keçərək, 36 saatlıq aramslz döyüşlərdən sonra sentyabrın 15-də Bakını işğalçılardan azad etdi. Beləliklə, böyük M.Ə.Rəsulzadənin sözləri ilə desək, “Azərbaycanın bədəni ilə başı birləşdi”. Biz bu cahanşümul qələbəni şərəf tariximizə yazmış qəhrəmanları ehtiramla yad edirik. Həm də Bakının işğaldan azad edilməsi şərəfinə nə vaxtsa 15 sentyabrın paytaxt günü elan olunmasına ümid edirik”, - deyə o, bildirib.

Vasif ƏLİHÜSEYN