adalet.az header logo
  • Bakı 12°C
  • USD 1.7
17 May 2022 08:59
1266
TEXNOLOGİYA

“Rusiyalı hakerlər” Qərb ölkələrinə kibermüharibə elan ediblər

“Killnet” qrupundan olan “Rusiyalı hakerlər” dünyanın on ölkəsinə kibermüharibə elan ediblər. Bu barədə assosiasiyanın nümayəndəsi qrupun rəsmi “Telegram” kanalında yayımlanan videoda bildirib.

“Bu gün biz on ölkənin hökumətinə qarşı rəsmi olaraq kibermüharibə elan edirik. Bundan sonra Amerika Birləşmiş Ştatları, Böyük Britaniya, Almaniya, İtaliya, Latviya, Rumıniya, Litva, Estoniya, Polşa və Ukrayna bizim hücumlarımıza məruz qalacaqlar”, – deyə “Killnet” nümayəndəsi qeyd edib.

Eyni zamanda o, Qərb ölkələrinə məhz hansı şəkildə hücum ediləcəyini dəqiq açıqlamayıb, lakin qeyd edib ki, qruplaşma və onun müttəfiqləri artıq sadalanan dövlətlərin infrastrukturuna zərbə endirməyə hazırdırlar. Bundan əlavə, “Killnet” qeyd edib ki, “qlobal hücumun sınağı başa çatıb”.

“Bu ölkələrin dinc vətəndaşları təhlükə altında deyillər. Bu ölkələrin hökumətləri ləğv ediləcək”, – deyə “Killnet nümayəndəsi” fikrini yekunlaşdırıb.

Bundan əvvəl “Killnet”in hakerləri “Beynəlxalq Haktivistlər Alyansı”nın yaradıldığını elan etmişdilər. Yeni assosiasiyanın əsas missiyaları isə “antifaşist” fəaliyyətlə yanaşı, NATO-nun genişlənməsinin qarşısını almaq, onun İT infrastrukturunu haker hücumlarının köməyi ilə məhv etmək idi.