Qədir Rüstəmovun anadan olmasının 90 illiyi ilə əlaqədar anım tədbiri Xəzərin “beş addımlığında” - Beynəlxalq Muğam Mərkəzin keçrilsə də,  tədbir sanki Ağdamda idi – dekabrın 19-da Ağdam ətrinə qərq olmuşdu bu sənət ocağı. Zala girərkən tanış simalar, mehriban çöhrələr adamı Ağdamın işğala qədər ki, dövrünə aparırdı. Seyid Lazım Ağalı, Qədirli, Rəmişli Ağdama...  

Gecənin aparıcısı yazıçı, Əməkdar mədəniyyət işçisi Mustafa Çəmənli səsi böyük türk ruhunun, mahiyyətinin təsdiqi olan  Qədir Rüstəmovun böyüdüyü mühit, sənətdə atdığı addımlar, keçdiyi həyat yolu, ona uğur qazandıran və sevdirən ifa tərzi, bənzərsiz istedadı, qeyri-adi xarakteri haqqında ətraflı məlumat verdi.  

Anım  gecəsində   yazıçı,  Milli Məclisin deputatı Aqil Abbasın, yazıçı Seyran Səxavətin tam səmimiyyətdən yoğrulmuş çıxışları işğaldan əvvəlki Ağdamlı günlərin xatirəsinə nur ələdi. Tamaşaçılar bu dəyərli qələm sahiblərinin çıxışlarının şirinliyindən, duzlu-məzəli söhbətlərin bitməsini istəmədi. “Qarabağın maralı”, “Apardı sellər Saranı”, “Laçın” ,“Qaragilə”, “Neyçün gəlməz”, “Olmaz-olmaz”, “Sarı gəlin”, “Reyhan”, “Ay dili-dili” və “Sona bülbüllər”i və s. mahnıları bənzərsiz ifa edən Qədir Rüstəmov haqqında xatirələri xoş ovqat yaratdı.   

Əməkdar incəsənət xadimi Çingiz Abbasovun, xanəndənin sənət dostu, tarzən Aydın Mehrəliyevin xatirələri də maraqla dinlənildi. Qarabağ sevdalı jurnalist  Fəxrəddin Hacıbəylinin Qədir Rüstəmovun İstanbuldakı   “Acıbadem” Xəstəxanasındakı ömrününü son anları bağlı   xatirələri tədbir iştirakçılarına kövrək hisslər yaşatdı.

Əməkdar artistlər İlkin Əhmədovun, Sevinc Sarıyevanın, Elnur Zeynalovun, muğam müsabiqəsinin qalibləri və iştirakçıları Güllü Muradovanın, Mustafa Mustafayevin, Yusif Cəfərbəylinin, Murad Laçının    ifaları, Əməkdar artist Azad Şükürovun Qədir Rüstəmova ithaf olunan şeiri səsləndirməsi anım tədbirinin gözəlliyinə rəng qatdı, tədbir iştirakçılarında xoş duyğular yaratdı.

Hikmət Xudiyev