Martın 26-da «Qalatasaray» Bakıya gəlir və Beynəlxalq Olimpiya stadionunda «Qarabağ»ın qonağı olacaq. Türk dünyasının iki əjdaha komandası qarşılaşacaq. Və bu oyunda yığılan pul da qardaş ölkədə zəlzələdən zərərçəkənlərin hesabına köçürüləcək. Yəni bu görüş xeyriyyə məqsədi daşıyır.

Baxıram, saytlarda, sosial şəbəkələrdə görüş geniş müzakirə olunur. Ay nə bilim əsas heyətlər oynamayacaq, ay nə bilim, stadion uzaqdı və sair və ilaxır. Amma bir nəfər maraqlı yazmışdı, deyəsən belə idi ki, BOS-da futbola baxmaq elə bil Binəqədidə oturub Balaxanıda futbola baxırsan. Xeyli güldüm. Həqiqətən elədir, iki-üç dəfə də mən həmin stadionda futbol izləmişəm. Gərək teatrda olduğu kimi özünlə durbin də götürəsən.

Nə isə. Bunlar bir bəhanədi. Qardaş ölkədə zəlzələ olan günün sabahı birinci yetişən Azərbaycan oldu. Ən çox xilasedicilər də Fövqəladə Hallar Nazirliyinin əməkdaşları idi, ən çox yardımı da Azərbaycan dövləti, Heydər Əliyev Fondu və Azərbaycan xalqı göstərdi. Elə adamlar oldu ki, evdəki son yorğan-döşəyini bağışladı.

İndi «Qarabağ»-«Qalatasaray» oyunu da xeyriyyə məqsədi daşıyır. İnanıram ki, stadion ağzına qədər dolacaq. Xalqımız qardaş ölkəni nə qədər sevdiyini bu oyunda da göstərəcək.

Qaldı kimin qalib gəlməsinə, bu o qədər də böyük önəm daşımır. Qalib qardaşlıq olacaq!