Qəribə olsa da, deyəcəyik; bu gün ölkəmizin regionlarında 100 tonlarla soğan anbarda qalıb, onun bazarı tapılmır. Daha doğrusu, soğanı əkib-becərən adamlar deyiblər ki, qardaş, 100 tonlarla soğanımız əlimizdə qalıb, heç gəlib bizdən 15-20 qəpiyə də alan yoxdur. İlboyu çəkdiyimiz əziyyət hədər gedir. 10-15 günə o soğanları satmasaq, hamısı məhv olacaq. Ona görə də biz əlaqədar qurumlardan kömək istəyirik. Xüsusən də Ağdamda, Bərdədə sahibkarlar soğanın satılmamasından və anbarda qalıb çürüməsindən çox gileylənirlər. Onlara isə heç bir qurum kömək göstərmir.

Amma bəzi işbazlar İrandan və o cümlədən, xarici ölkələrdən keyfiyyətsiz soğan gətirib camaata sırıyırlar. Özümüzün ucuz və keyfiyyətli soğanlarımız anbarlarda qalıb, xaricdən gətirilən zəhər kimi acı soğanlar od qiymətinə satılır. Hansı ki, yerli istehsal həmişə xaricdən gətirilən bostan və tərəvəz məhsulundan daha keyfiyyətlidir.

Bütün ölkələrdə daxili bazar qorunur. Əvvəlcə yerli istehsal satışa çıxarılır, sonra bu azlıq edirsə, xaricdən məhsul idxal edilir. Amma bizdə isə çox təəssüf ki, daxili bazarı qoruyan yoxdur, bu yerli məhsullar anbarda qalıb çürüyür. Bu isə ilboyu kəndlinin çəkdiyi zəhmətin hədər getməsi deməkdir.

Emil FAİQOĞLU