adalet.az header logo
  • Bakı 21°C
  • USD 1.7
15 Mart 2023 13:10
478
İDMAN

KAPİTAN FORMASI GEYİB SERJANT KİMİ OYNAYANLAR…

Futbolçuların geyindiyi forma da oyuna bir gözəllik qatır. Əvvəllər futbolçularımızın forması, yəni əyninə geydiyi maykalar, o qədər də yaraşıqlı deyildi. Hətta demək olar ki, yox idi. Bir dəfə Fransa ilə oynayanda futbolçularımızdan biri fransızla formasını dəyişmişdi. Ağasəlim Mircavadov deyirdi ki, sonra yalvardıq ki, formanı qaytarın, çünki forma çatışmır. İndi Allaha şükür, həm forma bolluğudu, həm də yaraşıqlıdı.

Bir dəfə «Zaman» qəzetinin bir müxbiri vardı, adı yadımdan çıxıb, yazmışdı ki, Azərbaycanın milli komandası Argentinanın formasını geyinib Masallının «Viləş» komandası kimi oynayırdı.

İndi baxıram, bir çox klubların futbolçularının formasının çiyinlərində dörd ulduz həkk olunub. Yəni kapitan rütbəsidi, amma oyunlarına baxırsan heç serjant kimi də oynamırlar.

Vaxtilə ən yaxşı formalardan biri «Qəbələ»nin idi. Formanın çiyinlərində də böyük ulduz vardı, yəni general forması idi. Elə onda da «Qəbələ» generala layiq olmasa da, polkovnik kimi oynaya bilirdi. Sonra nədənsə formanı dəyişdilər. Ondan sonra da serjant kimi olmasa da, leytenant kimi oynamağa başladılar.

Arzu edirəm ki, futbolçular geydiyi formalarına layiq oynasınlar. Çiyinlərinə kapitan rütbəsi vurublarsa serjant kimi oynamasınlar.