Formula 1 üzrə Türkiyə Qran Prisinin 2027-ci il oktyabrın 1-3-də keçirilməsi planlaşdırılır.

Formula 1-in 2027-ci il mövsümünün təqvimi açıqlanıb. Yeni təqvimə əsasən, mövsüm 22 ölkədə keçiriləcək 24 Qran Pri yarışından və 10 sprint yarışından ibarət olacaq.

Türkiyə Qran Prisi altı illik fasilədən sonra Formula 1 təqviminə qayıdacaq. Yarışlar İstanbul Parkda keçiriləcək.

Türkiyə Qran Prisi oktyabrın 1-də, cümə günü məşq sessiyaları ilə başlayacaq. Oktyabrın 2-də, şənbə günü sıralanma turu keçiriləcək. Əsas yarış isə oktyabrın 3-də, bazar günü baş tutacaq.

2027-ci ildən Formula 1-də sprint yarışlarının sayı da artırılacaq. Belə ki, sprintlərin sayı 6-dan 10-a yüksəldiləcək. Avstraliya, Bəhreyn, Yaponiya, Monako və Əbu-Dabi ilk dəfə sprint yarışına ev sahibliyi edəcək. Digər sprint yarışlarının Kanada, Böyük Britaniya, İtaliya, Braziliya və Qətərdə keçirilməsi nəzərdə tutulur.

Formula 1-in prezidenti və baş icraçı direktoru Stefano Domenikali 2027-ci il təqviminin dünyanın məşhur tras və şəhərlərini bir araya gətirdiyini bildirib.

“Türkiyəni çempionata qaytarmaqdan və sprint yarışlarının sayını 10-a çatdırmaqdan çox məmnunuq”, – deyə Domenikali qeyd edib.

Beynəlxalq Avtomobil Federasiyasının (FIA) prezidenti Məhəmməd Ben Süleyem isə bildirib ki, 24 Qran Pri yarışı, Portuqaliya və Türkiyənin Formula 1-ə qayıtması, eləcə də genişləndirilmiş sprint proqramı idmanda ənənə, innovasiya və azarkeş iştirakını bir araya gətirəcək.

Qeyd edək ki, 2027-ci il mövsümündə Portuqaliya da Formula 1 təqviminə qayıdacaq.