ABŞ ilə İran arasındakı hərbi toqquşmalar daha geniş əraziyə yayıla bilər.

Adalet.az xəbər verir ki, bunu Türkiyənin xarici işlər naziri Hakan Fidan "TRT Haber"ə müsahibəsində deyib.

"Əraqçi (İranın xarici işlər naziri Abbas Əraqçi) zəng vurdu və bu mövzuda telefonla danışdıq", - H. Fidan bildirib və Hörmüz boğazındakı gərginliyin İranın gəmilərə hücumu ilə yenidən alovlandığını xatırladıb.

Türkiyə XİN başçısının sözlərinə görə, ABŞ də İrana zərbələr endirib və tərəflər Hörmüz boğazının idarə olunması ilə bağlı ortaq məxrəcə gələ bilməyiblər:

"Boğazdakı keçid tənzimləməsi ümumi razılıqla reallaşdırılmalıdır. Əraqçi omanlı həmkarı ilə bir araya gələcək, çünki boğaza baxdığınız zaman bir tərəfində İran, digər tərəfində Oman var. İndi İranın beynəlxalq sularda öz haqqı var, 12 mil (19 km). Oman tərəfinin də var, bir də arada təxminən 20 milə (32 km) yaxın başqa bir sahə qalır. İndi hansı sahənin necə istifadə ediləcəyi ilə bağlı təfərrüata girmək istəmirəm".

H. Fidanın fikrincə, tərəflərin ümumi baxış bucağı olmasa, Hörmüz boğazının taleyi uzun müddət qaranlıq qala bilər.