"Cari ilin 10 ayında bank sektorunun kredit portfeli 7% artaraq 29,4 milyard manata çatıb. Problemli kreditlərin ümumi portfeldə payı 2,7% təşkil edib. Bu da kredit portfelinin keyfiyyətinin yüksək olduğunu göstərir. Kredit portfelində biznes kreditlərinin payı 53% olaraq qalır".

Adalet.az xəbər verir ki, bunu Milli Məclisin plenar iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı Mərkəzi Bankın sədri Taleh Kazımov deyib.

AMB sədrinin sözlərinə görə, 10 ayın nəticələrinə görə bank sektorunun 20,8 milyard manat kreditləşdirmə potensialı var ki, bu da real sektorun maliyyə resurslarına çıxış imkanlarının geniş olduğunu göstərir.

"Cari ilin 10 ayında bank sektorunun cəmi öhdəlikləri 10 ayda 6% artaraq 49,2 milyard manata çatıb, əmanətlər bu məbləğin 73,3%-ni təşkil edib. Əhalinin əmanətləri 15,5 milyard manat olub, bu da 8,7% artıma bərabərdir. O cümlədən müddətli əmanətlərdə 15%-lik artım müşahidə olunub. Son 3 ildə əhalinin müddətli əmanətləri orta hesabla hər il 22% artıb. Bu, həm əhalinin sosial rifah səviyyəsinin yaxşılaşdığını, həm də bank sisteminə olan inamın yüksək olduğunu göstərir”.

T.Kazımov qeyd edib ki, Azərbaycan iqtisaidyyatı sabit və dayanıqlı inkişaf etməkdə davam edir: "Yeni qlobal reallıqların formalaşdığı şəraitdə 2025-ci ilin 10 ayında ölkə iqtisadiyyatında artım davam edib. Ölkənin strateji valyuta ehtiyatları cari ilin 10 ayı ərzində 16,2 faiz artaraq 82,5 milyard ABŞ dollarına çatıb. Hazırda ölkənin strateji valyuta ehtiyatları 37 aylıq mal və xidmət idxalına kifayət edir. Cari ilin oktyabr ayında 12 aylıq inflyasiya 5,9 faiz təşkil edib, ərzaq inflyasiyası 8,2%, qeyri-ərzaq qiymətləri 2,5 faiz artıb. İllik baza inflyasya 5% olub".