Unuda bilməzsən məni heç zaman,
Sənin ürəyini alacaq duman.
İnan, qışqıracaq bütün el-cahan,
Ürəyin ağlayıb “Dünya!” deyəcək.

******

Elə düşünmə ki, sən qüvvəlisən,
Sən mənim eşqimdən, inan, dəlisən.
Gecə də yuxunda səksəkəlisən,
Qəlb səni dağlayıb "Dünya!" deyəcək.

******

Neçə ki, mən varam, bil, sən də varsan.
Mən olmasam əgər, yaz vaxtı qarsan,
Sən əriyib gedən anı sayarsan,
An səni saxlayıb "Dünya!" deyəcək.

******

Səndən uzağa gedərəmsə, əgər,
Səndən uzaqlaşıb itərəmsə, əgər,
Başqa bir məkana yetərəmsə, əgər,
Hiss gözü bağlayıb "Dünya!" deyəcək.

******

Bir daha Dünyaya gəlməyəcəksən,
Ürəklə danışıb, gülməyəcəksən.
Ölmək istəsən də, ölməyəcəksən,
Ürəyin çağlayıb "Dünya!" deyəcək.

******

İnan, dəli kimi gəzəcəksən sən,
Bil, özün-özünü əzəcəksən sən.
Dərdi ürəyinə düzəcəksən sən,
Əl,qolu bağlayıb "Dünya!" deyəcək.

******

Bir gün əcəl çatıb öləcəyəm mən,
Hər an xəyalına gələcəyəm mən.
Bütün sevincini siləcəyəm mən,
Ruhun qəm saxlayıb "Dünya!" deyəcək.

******

Gözlərin baxacaq,qan ağlayacaq,

Dərd-kədər əlindən can ağlayacaq,

Günün qaralacaq,dan ağlayacaq.

Həyat qəm saxlayıb, “Dünya!” deyəcək.

******

Öləndə baş daşın çatlayacaqdı,

Buludlar qəbrini sulayacaqdı,

İnan, sümüklərin ulayacaqdı

Qəbrin qəm saxlayıb, “Dünya!” deyəcək.

******

Gözündən qanlı yaş töküləcəkdi,

Qəlbinə dərd-kədər əkiləcəkdi,

Dərdimdən belin də büküləcəkdi.

Həyatın ağlayıb, “Dünya!” deyəcək.

******

Özünə zülm edib bil əzəcəksən,

Adımı qəlbinə sən düzəcəksən,

Sən məni axtarıb,hey gəzəcəksən.

Hər sözün,söhbətin “Dünya!” deyəcək.

******

Şeirin müəllifi:Dünya Qarabağlı-Azərbaycan Texniki Universitetinin Beynəlxalq Biznesin İdarə edilməsi ixtisasının magistratura tələbəsi.