Ermənistanın Zəngəzur bölgəsi vasitəsilə Azərbaycanla Türkiyə arasında cənub dəmir yolu əlaqəsi Bakı-Tiflis-Qars marşrutu ilə müqayisədə səyahət müddətini 25% azalda bilər.

Adalet.az xəbər verir ki, bu barədə Avropa Komissiyası məlumat yayıb.

“AB üçün Türkiyə, Şərq Tərəfdaşlığı regionu, o cümlədən Cənubi Qafqaz və Mərkəzi Asiya ilə nəqliyyat əlaqələrinin yaxşılaşdırılması xammal və malların daha sürətli və daha etibarlı idxalını təmin edə, eləcə də Avrasiya boyunca yeni ixrac bazarları aça və qarşılıqlı faydalı ticarətin inkişafına səbəb ola bilər.

Bu kontekstdə, Şimal Dəhlizinin etibarlılığının azalması və Cənub Marşrutunun inkişafının yavaşlaması fonunda Transxəzər Nəqliyyat Dəhlizi Avropa ilə Asiya arasında sabit, şaxələndirilmiş və geosiyasi cəhətdən dayanıqlı multimodal nəqliyyat əlaqəsi üçün ən perspektivli istiqamət hesab olunur.

Bundan əlavə, regionda yük daşımalarında əhəmiyyətli artım və 8 avqustda Ermənistanla Azərbaycan arasında əldə edilən razılaşma Transxəzər Nəqliyyat Dəhlizinin dayanıqlı və şaxələndirilmiş regional əlaqə üçün ən uyğun marşrut kimi mövqeyini daha da gücləndirə bilər”, - məlumatda qeyd edilib.

Vurğulanıb ki, Transxəzər Nəqliyyat Dəhlizi müzakirə edilərkən Qazaxıstan, Azərbaycan, Gürcüstan və Türkiyə Çindən Avropaya gedən marşrutda əsas oyunçular kimi qeyd olunur. Bununla belə, Ermənistan, Özbəkistan, Qırğızıstan, Moldova və Ukrayna kimi ölkələr də mühüm rol oynayır:

“Transxəzər Nəqliyyat Dəhlizi, Cənubi Qafqazdakı son geosiyasi inkişaflar fonunda Ermənistan, Azərbaycan və Türkiyə arasında əlaqələrin bərpasından da faydalana bilər. Bu, ticarət yollarının şaxələndirilməsinə və mövcud maneələrin aradan qaldırılmasına kömək edə bilər. Bu, həmçinin Ermənistanla AB arasında əlaqələri əhəmiyyətli dərəcədə yaxşılaşdıra bilər”.