Adalet.az xəbər verir ki, bu fikirləri “Aktual Xəbər”ə açıqlamasında Milli Məclisin deputatı Aqil Abbas Füzuli şəhərinin işğaldan azad edilməsinin 6-cı ildönümü ilə bağlı deyib.

Deputat bildirib ki, Vətən müharibəsində Füzuli istiqamətində gedən döyüşlər ən mürəkkəb və ağır əməliyyatlardan olub. Ermənistan silahlı qüvvələri uzun illər ərzində təmas xətti boyunca güclü müdafiə istehkamları qurmuşdu. Bu səbəbdən Füzulinin azad edilməsinin uzun müddət çəkəcəyini düşünənlər var idi. Lakin Azərbaycan Ordusunun əsgər və zabitləri yüksək peşəkarlıq, cəsarət və əzmkarlıq göstərərək düşmənin müdafiə xəttini yarıb şəhəri azad etdilər.

Aqil Abbas qeyd edib ki, 2020-ci il oktyabrın 17-də Füzuli şəhərinin işğaldan azad olunması ilə yanaşı, rayonun bir sıra kəndləri də düşmən tapdağından qurtarıldı. Bu qələbə Ermənistanın hərbi qüvvələrinin yenilməzliyi barədə yaratmağa çalışdığı mifi dağıtdı, Azərbaycan cəmiyyətində qələbəyə inamı daha da gücləndirdi. Füzulinin azad edilməsi, eyni zamanda, Şuşaya və işğal altında qalan digər ərazilərə doğru Zəfər yürüşünün növbəti mərhələsinin başlanğıcı oldu.

O bildirib ki, Füzulinin azad edilməsi Ermənistanın silahlı qüvvələrinin “yenilməzliyi” barədə yaratdığı mifi dağıtdı, Azərbaycan Ordusunun döyüş qabiliyyətini və hərbi əməliyyatları yüksək peşəkarlıqla həyata keçirmək gücünü nümayiş etdirdi.

Deputat vurğulayıb ki, dövlətimiz Füzuli uğrunda döyüşlərdə iştirak edən hərbçilərin qəhrəmanlığını yüksək qiymətləndirib. Şəxsi igidlik və şücaət göstərən hərbi qulluqçular “Füzulinin azad olunmasına görə” medalı ilə təltif ediliblər. Prezident İlham Əliyevin 2023-cü il 31 iyul tarixli Sərəncamı ilə oktyabrın 17-si Füzuli Şəhəri Günü elan olunub. Bu tarix xalqımızın Zəfər salnaməsində xüsusi yer tutur və gələcək nəsillərə qəhrəmanlıq nümunəsi kimi ötürülür.

A.Abbas bildirib ki, bu gün Füzulidə həyata keçirilən genişmiqyaslı bərpa və quruculuq işləri şəhərin yeni inkişaf mərhələsinə qədəm qoyduğunu göstərir. Yeni yaşayış massivləri salınır, sosial infrastruktur yaradılır, yollar və kommunikasiya xətləri çəkilir. Şəhərin gələcək inkişafını müəyyənləşdirən Baş plana uyğun olaraq Füzulinin müasir və rahat yaşayış məkanına çevrilməsi istiqamətində işlər davam etdirilir.

Onun sözlərinə görə, Füzuli Beynəlxalq Hava Limanının istifadəyə verilməsi, Zəfər yolunun və Əhmədbəyli–Füzuli–Şuşa avtomobil yolunun inşası bölgənin nəqliyyat imkanlarını genişləndirib. Bununla yanaşı, enerji və su təchizatı infrastrukturunun qurulması da şəhərin dayanıqlı inkişafı baxımından mühüm əhəmiyyət daşıyır. Füzulidə yeni yaşayış məntəqələrinin salınması və sosial obyektlərin tikilməsi keçmiş məcburi köçkünlərin doğma torpaqlarına qayıdışını sürətləndirir.

Deputat diqqətə çatdırıb ki, Füzulidə quruculuq işləri beynəlxalq əməkdaşlıq və Türk dünyasının həmrəyliyi fonunda da xüsusi əhəmiyyət kəsb edir. Özbəkistanın təşəbbüsü ilə şəhərdə Mirzə Uluqbəy adına məktəbin inşa edilməsi, Qazaxıstanın dəstəyi ilə Kurmanqazı adına Uşaq Yaradıcılıq Mərkəzinin yaradılması qardaş xalqlar arasında dostluğun bariz nümunələridir. Bu layihələr azad edilmiş ərazilərin bərpasına verilən dəstəyi nümayiş etdirməklə yanaşı, gələcək nəsillər üçün də mühüm töhfədir.

Aqil Abbas qeyd edib ki, Füzulinin dirçəlişinin əsas göstəricilərindən biri Böyük Qayıdış prosesidir. 2023-cü il avqustun 18-dən etibarən şəhərə keçmiş məcburi köçkünlərin köçürülməsinə başlanılıb. Doğma yurda qayıdan ailələr üçün yaşayış şəraitinin yaradılması, uşaqların təhsilə cəlb olunması və insanların gündəlik həyatının bərpası quruculuq siyasətinin əsas istiqamətlərindəndir.

“Ən böyük sevincimiz illərlə doğma torpaqlarından ayrı düşmüş insanların öz evlərinə qayıtmasıdır. Füzulidə yanan ev işıqları, məktəbə gedən uşaqlar, gündəlik həyatın yenidən canlanması Zəfərimizin bəhrəsidir. Bu proses təkcə şəhərin bərpası deyil, həm də xalqımızın doğma yurda bağlılığının və dövlətimizin gücünün ifadəsidir. İnanıram ki, görülən işlər nəticəsində Füzuli yaxın illərdə Azərbaycanın ən müasir və abad şəhərlərindən birinə çevriləcək”, – deyə deputat bildirib.