Böyük Britaniyanın yeni Baş naziri Endi Börnhem sosial mediada paylaşdığı videolar və qeyri-rəsmi üslubu ilə populist partiyaların üstünlüyünə meydan oxumağa çalışır.

Adalet.az xəbər verir ki, pablarda təqdim olunan qəlyanaltılar barədə fikirlərini bölüşməsi və öz görünüşü ilə zarafat etməsi kimi paylaşımları ilə diqqət çəkən Börnhemin videoları cəmi iki həftə ərzində “TikTok”, “X” və “Instagram” platformalarında milyonlarla baxış toplayıb.

Siyasi ekspertlərin fikrincə, Baş nazirin əsas məqsədi cəmiyyəti qütbləşdirən məzmun yaratmaq deyil, daha geniş auditoriyaya müsbət və inklüziv mesajlar çatdırmaqdır. Onlar hesab edirlər ki, bu yanaşma ölkədə iqtisadi artım və həyat səviyyəsinin yaxşılaşdırılması kimi çətin problemləri həll etməsə də, Baş nazirə geniş sosial media auditoriyası formalaşdırmağa kömək edir.

Endi Börnhemin səmimi ünsiyyət bacarığı Leyboristlər partiyasının keçmiş lideri və Baş nazir Kir Starmeri əvəzləməsində mühüm amillərdən biri kimi qiymətləndirilir.

Kir Starmerin strateji kommunikasiyalar direktoru olmuş Ceyms Lyons bildirib ki, E.Börnhem həm Baş nazir vəzifəsinə ciddi yanaşmağı, həm də özünü həddindən artıq ciddi təqdim etməməyi bacarır. Bu isə sosial mediada uzun illərdir immiqrasiya, cinayətkarlıq və sosial məsələlərlə bağlı videolar paylaşan “Reform UK” lideri Naycel Farajla rəqabətdə üstünlük qazandırmağa kömək edə bilər.