adalet.az header logo
  • Bakı 11°C
30 Mart 2023 19:09
1540
MÜSAHİBƏ

Paşa Qəlbinur: “İnsanlar qırx yaşından sonra ildə bir dəfə gözünü müayinə etdirməlidir”

Xəbər verdiyimiz kimi bu gün şair, oftalmoloq Paşa Qəlbinurun doğum günüdür.

Paşa Qəlbinur Adalet.az-a açıqlamasında doğum günüylə bağlı öz xoş təəssüratlarını bölüşüb:

“Doğum günlərimi adətən evdə, ailəmlə qeyd edirəm. Yetmiş bir yaşım tamam olur. Təbrikiniz üçün çox sağ olun”.

- Bəs göz həkimləri öz gözlərini necə qoruyur?-sualına P.Qəlbinur belə cavab verib:

“Mənim gözüm yaxını üç, uzağı isə iki dəfə artıq görür. Belə doğulmuşam və atamın da gözləri belə idi. Bu da mənə sənətimdə kömək edir. Ancaq gözlərimizi qorumaq üçün yayda və qışda günəşli qarlı havada hökmən gün eynəyi taxmaq lazımdır. Çünki gözün içində nöqtə boyda bir ləkə var, eynək taxmayanda həmin ləkə zədələnir və gözə ziyan olur. Bir şeirimdə yazmışdım ki, “dünyada üç dənə ləkə var, biri göydəki, biri yumurtanın içindəki və biri də insanın gözündəki ləkədir”. Bir də ki, insanlar qırx yaşından sonra ildə bir dəfə gözünü müayinə etdirməlidir. Əgər gözdə irsi xəstəlik varsa, elə uşaq vaxtından  həkimə müraciət etmək lazımdır”.

P.Qəlbinur bu yaşında özünü gümrah hiss etdiyini bildirib:

“Bir var təqvim yaşı, bir də var ki, bioloji yaş. Vaxtında idmanla məşğul olmuşam, indi dağa da qaçıram, bir neçə dəqiqə suyun altında da qalıram. Bunu da mənə Allah verir. Sizlərə də uzun ömür arzu edirəm”. 

P.Qəlbinur hazırladığı yeganə dərman preparatından da danışıb:

“Mən dünyanın böyük ölkələrinin təsdiq etdiyi yeganə göz dərman preparatı “Aktipol”un müəllifiyəm. Bu dərmandan Amerika və Avropada pandemiya dövründə də istifadə olunub. Axı kovid xəstəliyi ağızdan, burundan və bir də gözdən insana yoluxur. Bu dərmandan bütün dünyada istifadı olunub”. 

Vasif Əlihüseyn