“Azərbaycan cəmiyyəti kin və nifrəti içərisində kinetik enerji kimi saxlayır (FB də bunun güzgüsüdür) və onu püskürmək üçün hər an fürsət axtarır. Qurban Qurbanova münasibət də elədir….Dünən “Qarabağ”ın yarıtmaz oyununa uğursuzluğa, səhvlər silsiləsinə və komandanın məğlubiyyətinə mən də çox üzüldüm, xeyli əsəbilik keçirtdim və qaralarınca deyindim”. 

Adalet.az xəbər verir ki, bunu professor Qulu Məhərrəmli deyib. 

“Amma uzun illərdir bizə qələbə sevinci və qürur yaşatmış, futbolumuza böyük uğurlar qazandırmış rəmzi bir ad daşıyan komandaya və fədakar məşqçiyə arxa çevirmək, unutqanlıq etmək, onları aşağılamaq ağlımdan da keçmədi.Bəli, oyun alınmadı, hamımızın kökləndiyi qələbəli nəticə olmadı. Bunun səbəbini hərə bir cür yoza bilər: gücün azalması, yanlış taktika, orğunluq da, bacarıqsızlıq da, zamanla ayaqlaşa bilməmək, hətta karyeranın sonu da ola bilər. Amma bütün bunlar “Qarabağ”ı söyməyə, məmləkəti dəfələrlə sevindirmiş Qurban Qurbanovun şəxsiyyətinə hücum üçün əsas ola bilməz”, - deyə o, bildirib.

Vasif ƏLİHÜSEYN