“İyun seçkilərindən sonra Nikol Paşinyan yenidən Ermənistanın Baş naziri təyin olunub. Nazirlər kabinetinin əksər üzvləri, o cümlədən xarici işlər və müdafiə nazirləri öz postlarında qalsalar da, bu proses İrəvanın xarici siyasətdə Qərb meyilli kursunu, regional sülh danışıqlarını davam etdirəcəyinə və idarəetmədə kadr islahatlarına start verdiyinə işarədir”. 

Bunu Adalet.az-a açıqlamasında siyasi şərhçi Tural İrfan deyib. 

O, bildirib ki, Paşinyanın təşəbbüsü ilə xarici universitet məzunlarının dövlət idarəçiliyinə cəlb olunması üçün "kadr bankı" yaradılması nəzərdə tutulub ki, bununla bağlı artıq 1000-dən çox müraciət nəzərdən keçirildiyi qeyd olunur. Seçkiqabağı rüşvət və qeyri-rezidentlərin iştirakına qarşı yeni qanunvericilik dəyişiklikləri də müzakirə olunur. Bütün bunlarla yanaşı, ən əsası isə Azərbaycanla yekun sülh sazişinin imzalanması və kommunikasiya xətlərinin açılması istiqamətində diplomatik tempin qorunub saxlanılması gözlənilir. Hazırda hakim komanda konstitusiya dəyişiklikləri və mümkün referendumla bağlı hədəflərini reallaşdırmaq üçün parlamentdə əlavə səslər toplamağa çalışır. Rusiyanın təsirində olan dairələrin nailiyyət əldə etməməsi Paşinyan hökumətinin Qərbə üz tutmaqda davam edəcəyini və Moskvanın təziqlərinin artacağını göstərir. Bu təhdidlər qarşısında Qərbin də dəstəyini alan Ermənistan hökuməti regional sülh prosesində iştirakdan geri çəkilməyə meylli deyil. Gərginliyi azaltmaq və iqtisadi asılılığı nəzərə alaraq İrəvan Rusiya ilə Qərb arasında balanslı siyasət izləməyə çalışır”.

Vasif ƏLİHÜSEYN