Qazaxıstan və Avropa İttifaqı aviasiya, nəqliyyat infrastrukturu və mineral ehtiyatların inkişafı sahələrində bir sıra sazişlər və memorandumlar imzalayıblar.

Adalet.az xəbər verir ki, bu barədə Qazaxıstan Prezidentin mətbuat xidmətinin məlumat yayıb.

İmzalanma mərasimi Brüsseldə Qazaxıstan Prezidenti Kasım-Jomart Tokayev, Avropa Şurasının prezidenti António Kosta və Avropa Komissiyasının prezidenti Ursula fon der Lyayenin iştirakı ilə baş tutub.

Qazaxıstan hökuməti ilə Avropa İttifaqı arasında "Hava nəqliyyatının müəyyən aspektləri haqqında" saziş imzalanıb.

Bundan əlavə, "Air Astana" ASC ilə "Airbus" arasında 50-yə qədər təyyarənin təhvil verilməsi üçün təntənəli şəkildə sifariş imzalanıb.

Qazaxıstan Nəqliyyat Nazirliyi və Avropa Yenidənqurma və İnkişaf Bankı intellektual nəqliyyat sistemlərinin tətbiqi və E-Zholdary rəqəmsal platformasının yaradılması üçün qrantın verilməsi barədə anlaşma memorandumu imzalayıblar.

Avropa İnvestisiya Bankı və "KazAvtoJol" SC arasında Transxəzər Beynəlxalq Nəqliyyat Marşrutunun bir hissəsi olan Qazaxıstanın bölgələrində avtomobil yollarının bərpası layihələrinin maliyyələşdirilməsinə dair memorandum da imzalanıb.

Qazaxıstan Sənaye və Tikinti Nazirliyi ilə Avropa Yenidənqurma və İnkişaf Bankı arasında daha bir memorandum imzalanıb. Sənəddə Minerallar və Metallar üzrə Mükəmməllik Mərkəzinin yaradılması üçün texniki-iqtisadi əsaslandırmanın hazırlanmasında əməkdaşlıq nəzərdə tutulub.