Ümumiyyətlə, insan ömrünün mənası, çəkisi, dəyəri illərlə yox, onun nə yaşadığı  və necə yaşamağı ilə ölçülür.  

Bəzən ömrün mənası insanın yaşamının bir anı ilə ifadə olunur. Bu an sevincli məqam da ola bilər, kədərli  məqam da. Yetər ki, həmin anın içində məna olsun. 

Ömrünün cavan çağında ahıl ana obrazı ilə yaddaşlarda qalan aktrisa  Leyla Rzayeva da qısa ömrünə böyük məna sığdıra bildi.

Biz onu “Böyük dayaq” filmindən  Səkinə ana kimi tanıyırıq.  Həmin obrazla sevilən aktrisa bir-birindən gözəl obraz yaratsa da, tamaşaçılar onu məhz  “Səkinə ana” kimi sevmişdilər. 

Uşaqlıq illəri  müharibə dövrünə təsadüf edən Leyla Rzayeva  orta məktəbi başa vurandan sonra Azərbaycan Teatr İnstitutuna daxil olub. Burada o, Xalq artisti, rejissor  Mehdi Məmmədovun  sinfində təhsil alır.  Təhsilini başa vurduqdan sonra Akademik Milli Dram Teatrına d əvəvt olunur. Orada səhnə fəaliyyətinə başlayıb. Aktrisa ömrünün sonuna kimi həmin teatrda fəaliyyət göstərib. Səhnə aktrisa ikinci evinə çevrilir. O, həmin səhnədə bir- birindən gözəl obrazlarla tamaşaçıların qarşısına çıxır. 

Teatrda fəaliyyəti ilə yanaşı aktrisanın kino fəaliyyəti də  diqqətdə kənarda qalmır. O, 959-cu ildə “Əsl dost”, 1960-cı ildə “Aygün” və “Səhər”, 1962-ci ildə “Böyük dayaq”, 1963-cü ildə “Əhməd haradadır?” və b. filmlərə çəkilib. Aktrisa  “Böyük dayaq” filminə  həmin filmdə  Rüstəm kişi obrazını canlandıran xalq artisti  Əsələgər Ələkbərovun  dəvəti ilə gəlir.  Yaşının və təcrübəsinin az olmağına baxmayaraq, müdrik ana obrazını məharətlə ifa edir. O, “Səkinə ana” obrazı ilə Azərbaycan qadının  necə əxlaqlı, mədəniyyətli, müdrik, düşüncəli, ailəcanlı olduğunu  bu vasitə ilə sübut edir.

Aktrisa kimi sevilsə də qadın kimi heç də xoşbəxt olmayan aktrisa iki dəfə ailə həyatı qurur.  Birinci nigahından 3 övladı dünyaya gəlir — Məsumə, Xanlar və Qəmər. İkinci nigahından  isə Əziz adlı oğlu olur. Aktrisanın dörd övladının ikisi – Məsumə və Xanlar dünyasını dəyişib.
İlk nigahdan olan qızı Qəmər  məşhur müğənni, Xalq artisti Elxan Əhədzadənin həyat yoldaşı olub.  Onların bu nigahdan Əhəd adlı övladları olur.  Elxan Əhədzadənin ölümündən  illər sonra oğlu Əhəd də dünyasını dəyişir. 

Nəvəsi Sona Rzayeva müsahibələrinin birində deyir ki, demək olar ki, nənəsi Leyla Rzayeva haqda çox dah məlumatı yoxdur. Çünki aktirsa çox erkən dünyasını dəyişdiyi üçün övladları da onu yaxşı xatırlamır. Ancaq böyüklərindən eşitdiyinə görə, aktrisa canlandırdığı Səkinə ana obrazı kimi mülayim və mehriban insan imiş.

Ömrünün  yaşayıb, yaratmaq çağında olan aktrisanı əcəl yaxalayır. Belə ki, o,  1970-ci ildə beyninə  qan sızma nəticəsində 40 yaşında dünyasını dəyişir.  

Əntiqə Kərimzadə