adalet.az header logo
  • Bakı 23°C
  • USD 1.7
23 Iyul 2022 17:18
607
ELM VƏ TƏHSİL

Məktəbli formalarının kütləvi istehsalına başlanılır

2022-ci ilin martında Azərbaycan Respublikası Nazirlər Kabineti “Azərbaycan Respublikasının dövlət ümumi təhsil müəssisələrinin şagirdləri üçün formanın təsviri” sənədini təsdiqləyib.

Bununla da, hökumət 2022-2023-cü tədris ilində dövriyyəyə buraxılmalı olan qış və yay dəstlərinin yeni modellərini təsdiqləyib.

Bəs, yeni formaların tikilməsi üçün xaricdən gətirilməsi nəzərdə tutulan parçalar ölkəyə çatıbmı?

Adalet.az  xəbər verir ki, Azərbaycanda məktəbli formalarının tikilişini və satışını həyata keçirən “Bakı Tikiş Evi” (BTE) ASC-nin satış üzrə müdiri Etibar Əzimov mövzu ilə bağlı Modern.az-a açıqlamasında avqust ayının 10-da tikişlərə başlanılacağını deyib.

O bildirib ki, parçaların yarısı artıq ölkəyə gətirilib, yarısı isə yoldadır:

“Parçalar həm Türkiyədən, həm Belarusdan, həm də Özbəkistandan gətirilir. Qiymətlər isə hələ təsdiq olunmayıb. Parçalar hamısı ölkəyə gətirilməlidir, yol xərcləri və s. hesablanmalıdır ki, qiymətlər təyin olunsun. Parçaların keyfiyyəti yüksək olduğu üçün yeni məktəbli formalarının da bahalaşacağı istisna deyil”.

Satış üzrə müdir qeyd edib ki, avqustun ilk həftəsindən etibarən qiymətlər də daxil olmaqla hər şey təyin olunacaq.