“İnsan Alverinə Qarşı Mübarizə Təşkilatı” Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Uçuruma aparan yol!” layihəsinə start verib.

Təşkilatının mətbuat katibi Azər Bağırov bildirib ki, layihə 3 ay ərzində həyata keçiriləcək. Layihənin əsas məqsədi dövlətin insan alverinə qarşı apardığı mübarizədə vətəndaş cəmiyyətinin rolunu artırmaq və Azərbaycan polisinin peşəkarlığını nümayiş etdirməkdir.

A. Bağırov bildirib ki, layihə çərçivəsində 7 dəqiqəlik qısametrajlı film hazırlanacaq: “QHT-lərə Dövlət Dəstəyi Agentliyinin maliyyə, Daxili İşlər Nazirliyinin isə təşkilati dəstəyi ilə ərsəyə gələcək filmin əsas sujet xətti insan alveri qurbanı olmamaq üçün atılacaq addımlardan ibarətdir". 

Mətbuat katibi vurğulayıb ki, filmin piar işinin həyata keçirilməsi də görüləcək işlər sırasındadır: “Filmin Sumqayıt şəhərlərində təqdimatı keçiriləcək. Eyni zamanda filmin youtube və digər sosial şəbəkələrdə geniş formada yayımı reallaşdırılacaq. Çəkilən qısametrajlı film televiziya kanallarına da təqdim olunacaq”.