Xəbər verdiyimiz kimi bu ildən ilk dəfə olaraq Zəngilan rayonunun Ağalı kənd tam orta məktəbində buraxılış imtahanı keçiriləcək. 

Adalet.az xəbər verir ki, bu haqda AMEA-nın əməkdaşı, imtahan rəhbəri, Vətən müharibəsi şəhidi, mayor Vüsal Vəliyevin qardaşı Elyar İslamoğlu məlumat verib. E.İslamoğlu 29 ildən sonra Zəngilanda imtahan keçirilməsinin sevindirici olduğunu bildirib:

“Dövlət İmtahan Mərkəzi 12 mart 2023-cü il tarixdə Ermənistanın işğalından qəhrəman oğullarımızın qanı bahasına azad olunan Zəngilan rayonunun Ağalı kənd tam orta məktəbində 29 ildən sonra ilk dəfə tam (11 illik) orta təhsil səviyyəsi üzrə buraxılış imtahanı keçirəcək.

İşğala qədər bu inzibati ərazi 3 kəndi birləşdirib. Həmin dövrdə Birinci Ağalıda 40 ailə (154 nəfər), İkinci Ağalıda 60 ailə (245 nəfər), Üçüncü Ağalıda isə 161 ailə (675 nəfər) yaşayıb. Hazırda bu kəndlərdən olan ailələrin ümumi sayı 352-dir (1504 nəfər)”. 

Vasif Əlihüseyn