Bakı 17°C 
Əbülfət Mədətoğludan yeni şeir: GƏL
Dur gəl məni danışdır,
Bir az çıxım içimdən...
Bir az eşqə bulaşdır -
Bir az sevgi içim , mən...
Gəl, su uman ağac tək
Yarpaqlarımı dirilt...
Əlini sinəmə çək -
Çək , ürəyimi kirit!..
Gəl , qaralan gözümün
Didəsində şam yandır...
Bu şöləni görənlər -
Desinlər ki , şamandır...
Gəl , lap dinmə , danışma
Əlimi ovcuna al...
Lap heç mənə qarışma -
Amma qal!- beləcə qal...
