adalet.az header logo
  • Bakı -°C
16 Noyabr 2026 10:10
50
ƏDƏBİYYAT
A- A+

Əbülfət Mədətoğlu: Sən də gül...

İstəyirəm bir  sirr açım biləsən    
Ümidlərim  tumurcuqdu  səndə , gül !  
Gözümdəki  buludlara  bənd  olma - 
Görürsən ki, qəmim  gülür, sən də gül!

Qara  ağa,  göy  sarıya  qarışıb  
Gözdən  daman  şeh   yarıya  qarışıb... 
Bal  pətəyə, həm  arıya  qarışıb -  
Səndən  gizlim  qalmayıbdı  məndə, gül!

Mən  inancı  sudan  duru  biriyəm   -
Bir  sevginin  and  yeriyəm, piriyəm!  
Sən  sevdikcən  mən  də varam,   diriyəm -  
Görürsənmi  necə  sevir   bəndə , gül!?.

Əbülfətə, ay  uzaqdan  gələnim,
Gəl, yoluna misra- misra  ələnim...
Kipriklərin,  dan   şehinə  bələnim -
Ovsunlanım  , bir  də  düşüm  bəndə  gül!