COVID-19-a qarşı mRNT peyvəndi xərçəngin immunoterapiyasına başlanıldıqdan qısa müddət sonra tətbiq edilərsə, orqanizmin şiş əleyhinə immun cavabını gücləndirə bilər.

Adalet.az xarici KİV-ə istinadən xəbər verir ki, bu nəticəyə Florida Universiteti və MD Anderson Xərçəng Mərkəzinin alimləri gəliblər.

Mütəxəssislər ağciyər və dəri xərçəngi diaqnozu qoyulmuş minə yaxın xəstənin məlumatlarını təhlil ediblər.

Məlum olub ki, immunoterapiyaya başlandıqdan sonra 100 gün ərzində mRNT peyvəndi alan xəstələr daha uzun ömür sürüb. Belə ki, ağciyər xərçəngi olanlarda orta ömür müddəti 20 aydan 37 aya, melanomada isə 26 aydan 40 aya qədər artıb. Digər növ peyvəndlər, o cümlədən qripə qarşı preparatlar isə oxşar təsir göstərməyib. Alimlərin fikrincə, bu təsir mRNT peyvəndlərinin təbii immuniteti aktivləşdirmə xüsusiyyəti ilə əlaqədardır. Peyvənd immun sisteminə “siqnal impulsu” göndərərək onu yenidən proqramlaşdırır və şiş hüceyrələrini daha effektiv tanımağa və məhv etməyə kömək edir. Xüsusilə, immunoterapiyaya zəif reaksiya verən xəstələrdə bu təsir daha güclü müşahidə olunub.