Otaqo Universitetinin alimləri siçanlar üzərində aparılan tədqiqatda analarda balalarına qarşı maraq və onlarla təmasdan həzz alma hissini formalaşdıran neyron zəncirini tapıblar.

Adalet.az xəbər verir ki, tədqiqatın nəticələri “Science Advances” jurnalında dərc olunub.

Məlum olub ki, prolaktin hormonu balanın qoxusunu qəbul edərkən beynin həzz sistemində dofamin ifrazını tətikləyir. Süni şəkildə bu mexanizm aktivləşdirildikdə balalamamış siçanlar belə balalara can atıb, siqnal bloklandıqda isə yeni anaların balaları ilə vaxt keçirmək həvəsi kəskin azalıb.

Alimlər bildirirlər ki, bu kəşf doğuşdan sonrakı emosional pozuntuları anlamağa kömək edəcək və bəzi analarda emosional bağın zəifləməsinin şəxsi səhv deyil, beyindəki neyron zəncirinin düzgün işləməməsindən qaynaqlandığını göstərir.