adalet.az header logo
  • Bakı 23°C
  • USD 1.7
02 Avqust 2022 15:03
405
İDMAN

Azərbaycan millisinin böyük məşqçisi: "Avropada bizdən başqa qızıl medal qazanan ölkə olmadı"

“Bütün güləş həvəskarlarını və Azərbaycan xalqını bu qələbə münasibətilə təbrik edirəm. Təxminən 40 gün əvvəl Avropa çempionatından möhtəşəm qələbəylə qayıtmışdıq. 6 qızıl, 1 gümüş və 2 bürünc medalla komanda hesabında çempion olmuşduq. Təbii ki, Avropa və dünya çempionatları fərqli yarışlardır".

 "Report" xəbər verir ki, bunu Azərbaycanın yeniyetmə güləşçilərindən ibarət millisinin böyük məşqçisi Əsgərxan Novruzov deyib.

İtaliyanın paytaxtı Romada keçirilən U-17 dünya çempionatında uğurlu çıxış edən sərbəst güləş üzrə millimiz Vətənə qayıdıb. Komanda hesabında dünya 3-cüsü olan yığmamızı Gənclər və İdman Nazirliyinin və Güləş Federasiyasının rəsmiləri, məşqçilər, güləşçilər və idmançıların ailə üzvləri qarşılayıb.

Böyük məşqçi mətbuata açıqlamasında Avropa qitəsindən Azərbaycanın yeganə qızıl medal qazanan ölkə olduğunu bildirib:

"Komandamızın hazırlığı o qədər yaxşı idi ki, dünya çempionatından da daha yaxşı nəticə gözləyirdik. O cümlədən komanda hesabında çempion olacağımıza inanırdıq. Yəqin ki, görüşlərimizi izləmisiniz. Bir çox xallarımız son anlarda əldən getdi. Dünya çempionatı çox ağır keçdi. Daim ön sıralarda olan İranı qabaqlayıb 3-cü yeri tutduq. Məşqçilər və güləşçilər sağ olsunlar. Özlərini doğrultdular. Dünya çempionatında 2 qızıl medal Azərbaycan üçün çox yaxşı nəticədir. Avropada bizdən başqa qızıl medal qazanan ölkə olmadı. Bizim əsas işimiz böyüklərdən ibarət komanda üçün güləşçilər yetişdirməkdir. Bu gün heyətdə yer alan 6 idmançımız gələn ildən gənclərdə yer alacaq. Məqsədimiz bütün yaş qrupları üzrə birgə fəaliyyət göstərib, Azərbaycan güləşini zirvəyə yüksəltməkdir”.

Xatırladaq ki, mundialda Vasif Bağırov (48 kq) və İlyas İsayev (65 kq) qızıl, Bəşir Verdiyev (45 kq) gümüş, Elman Ağayevlə (51 kq) Ağanəzər Novruzov (71 kq) isə bürünc medal qazanıb.