ABŞ bir sıra nüvə silahlarını modernləşdirməyi, həmçinin yenilərini istehsal etməyi planlaşdırır.

Bu barədə ABŞ-nin Milli Nüvə Təhlükəsizliyi Administrasiyasının (NNSA) Konqresə təqdim etdiyi hesabatında deyilir.

Xüsusilə, nüvə başlıqları üçün 80 plutonium nüvəsinin istehsalı, dənizdən buraxılan “Tomahawk” qanadlı raketləri təchiz etmək üçün W80-4 döyüş başlığının modernləşdirilməsi, hazırlanmaqda olan “Sentinel” qitələrarası ballistik raketi üçün W87-1 nüvə başlığının yaradılması, perspektivli “Columbia” sinifli sualtı qayıqların ballistik raketlərinin W93 döyüş başlığının yaradılması, hazırkı Ohayo sinifli strateji sualtı qayıqlar üçün W88 döyüş başlıqlarının modernləşdirilməsi, həmçinin B61-12 bombalarının istehsalının davam etdirilməsi planlaşdırılır.

Hesabatda ABŞ Hərbi Hava Qüvvələrinin yeni B61-12 nüvə bombaları aldığı da bildirilir. Onlar indi B-2 Spirit strateji bombardmançıları ilə təchiz olunublar.

Hazırda beş Avropa ölkəsində və Türkiyədə altı əməliyyat bazasında yeraltı anbarlarda təxminən 100 ədəd B61 taktiki nüvə bombası saxlanılır.