YAS QİYBƏTİ - Rauf Qərib Alagöz yazır
Dedilər "qonşu Həsən kişi intihar edib", yığılıb getdik.
Biz çatana kimi yuyub kəfənləyib gətirib tabutda qoymuşdular evin ortasına. Molla quran oxuyurdu.
Həsənin anası ağlayırdı:
- Dedim alma ...lı qızını. Oralılardan adama arvad olmaz. Oğlumun öyünü yıxdılar.
Həsənin Bacısı:
- Ay qardaş, balaların yedi başını, ay qardaaaaş.
Arvadı:
- Məni borc içində qoyub hara getdin, ay öyü yıxılmış.
Qızı:
- Mən nişanlımın ailəsinin üzünə necə baxacam. Deyəcəklər atası intihar edib.
Oğlu dostuna:
- Sən birlərsən, evi, maşını adıma necə keçirə bilərəm?
Qonşu Fatma xala pıçıldayırdı:
- Deyirlər arvadı, bacısı gəzirmiş, ona görə asıb özünü.
Qonşu Şakir kişi:
- Qumara Borcu var imiş, öldürüb sonra asıblar.
Uzaq qohum:
- Axır zamanlar gözümə nəsə birtəhər dəyirdi. Nəsə atırdı deyəsən. Beynini qurutdu.
Başqa bir qonşu:
- Görəsən ehsan verəcəklər? Verməəyəcəklərsə, pul da yazdırmaram.
Başqa bir qohum:
- Mənə 100 manat borcu var idi. Batdı.
Tanımadığım biri:
- Deyirlər kişilikdən kəsilibmiş, ona görə özünü öldürüb. xixixi
Molla:
- Cəmaət, Mərhuma haqqınızı halal edin.
Camaat:
-Halal olsun, yaxşı adam idi.
İntihar edən kişi idi. Gör qadın intihar eləsə, arxasından nələr deyəcəkdilər...