Günün ən uzun lətifəsi
ÖZÜMÜZÜ YAXŞI APARSAQ HOVUZA SU DA BURAXACAQLAR
Molla Nəsrəddin gedirmiş, qarşısına üz-gözündən yorğunluq tökülən bir tanışı çıxır. Molla soruşur ki, niyə belə əzginsən, nolub?
- Molla, birotaqlı daxmam var, iki uşaq, arvad, mən, sıxlıqdı. Gecələr də yuxum ərşə çəkilib. Bəlkə bir məsləhət verəsən?
- İnəyin var?
- Bəli.
- Mənə inanıb məsləhət istəyirsənsə, bu gündən inəyi də gecələr gətir evə.
Kişi çaşır, amma deyir ki, baş üstə.
Axşam inəyi gətirir evə. Üç-dörd gündən sonra yenə molla ilə rastlaşır. Yenə həminki vəziyyətdədi.
Deyir:
- Molla, lap qırıldıq.
- Qoyun-quzu var?
- İki-üç dənə var.
- Axşam onları da gətirib evdə saxlayarsan.
Kəsəsi. Kişi yenə mollaya qulaq asır. Aradan üç-dörd gün də keçir. Yenə molla ilə rastlaşır:
- Ay molla, belə getsə basırıqdan öləcəyik.
- Atın var?
- Hə, bir yabım var.
- Bu axşam onu da gətir evə.
Kişi yenə mollaya qulaq asır.
Aradan beş-altı gün keçir, yenə rastlaşırlar. Molla görür ki, kişi lap ağır gündədi.
- Ay molla, mən cəhənnəm ey, arvad-uşaq da qırılır.
- Get inəyi evdən çıxart.
Kişi inəyi evdən çıxarır. Üç-dörd gündən sonra yenə rastlaşır mollayla. Molla soruşur ki, vəziyyət necədi?
- Molla, bir az rahatlaşmışıq.
Molla deyir:
- Get o qoyun-quzunu da çıxart.
Kişi gedir qoyun-quzunu da çıxarır.
Üç-dörd gündən sonra yenə molla ilə rastlaşır. Molla soruşur ki, vəziyyət necədi?
- Allah səni saxlasın, bir az da rahatlaşmışıq.
Molla deyir:
- Get atı da çıxart.
Kişi gedib atı da çıxarır. Dörd-beş gündən sonra yenə rastlaşırlar. Molla görür ki, kişinin kefi göylə gedir. Soruşur ki, vəziyyət necədi?
- Allah balalarını saxlasın, molla, sən nə ağıllı adamsan? Vallah, evdə uşaqlarla qaçdı-tutdu oynayırıq.
İndi biz də həmin kişinin günündəydik. Allaha şükür, SMS-i ləğv elədilər, postları götürdülər.
Deyirlər bazar ertəsindən bərbərxanalar da işləyəcək, rayonlara gediş-gəliş də. Hələ birinci gündən kafelər, çayxanalar, restoranlar da açılacaq, təbii ki, ara məsafəsini mütləq gözləməliyik ey. Kafe, restoran, çayxana avtobus deyil ki, ağız-ağıza gedək.
Hətta deyirlər, fevralın 1-dən məktəblər, bağçalar da açılacaq. Adamın sevincdən az qala ürəyi partlasın. Yəqin metro da açılar.
Hələ özümüzü yaxşı aparsaq, hovuza su da buraxacaqlar.