20 sentyabr 2025-ci il tarixdə Dövlət Suverenliyi Günü münasibətilə Sumqayıt şəhərində yerləşən “Bakı” şadlıq sarayında Yardımlı Xeyriyyə Cəmiyyəti İctimai Birliyinin təşəbbüsü və təşkilatçılığı ilə tədbir keçirildi. 

Çıxış edən Yardımlı Xeyriyyə Cəmiyyəti İctimai Birliyinin sədri Mərdan Seyidbəyli Dövlət Suverenliyi Günü münasibətilə tədbir iştirakçılarını təbrik etdi. Tələbə adını qazanan məzunlara gələcək təhsil illərində uğurlar arzulayan M.Seyidbəyli Yardımlı Xeyriyyə Cəmiyyətinin şagird və tələbələrə diqqət və qayğısının hər zaman davam edəcəyini vurğuladı: “Tələbələrdən tək istəyimiz universitet illərini uğurla başa vurmaq, elimizə-obamıza, millətimizə, dövlətimizə layiqli mütəxəssis kimi yetişməkdir. Cəmiyyət olaraq hər zaman yanınızdayıq, problemlərinizin həll olunmasında əlimizdən gələn dəstəyi göstərəcəyik”.

Bu möhtəşəm bayram günündə 2024/2025-ci tədris ilində Yardımlı rayonu üzrə Təhsil sektorunun tabeliyində fəaliyyət göstərən ümumi təhsil müəssisələrinin tələbə adını qazanan məzunları, onların valideynləri və təhsil işçiləri gənclərlə görüşün təşkilinə, göstərilən diqqət və qayğıya görə minnətdarlıqlarını bildirdilər. Tələbələr onlara bəslənən ümidləri əməli işləri ilə doğruldacaqlarını, ixtisasları üzrə elmin sirlərinə dərindən yiyələnərək vətənimiz üçün layiqli mütəxəssislər, kadrlar olacaqlarını qeyd etdilər. Görüşdə iştirak edən elm və mədəniyyət adamları, xeyriyyəçi iş adamları tələbələri səmimi qəlbdən təbrik etdi, onlara yenicə qədəm qoyduqları müstəqil həyatda daha böyük uğurlar, cansağlığı və xoşbəxtlik arzuladılar.

Sonda tələbə adını qazanan məzunlar hədiyyələrlə, fəxri fərman və təşəkkürnamələrlə mükafatlandırıldı.