“Azərbaycanda elektron siqaretlərin qadağan edilməsi ilə bağlı irəli sürülən təşəbbüsün konkret kim tərəfindən irəli sürüldüyünü dəqiqliklə bilməsəm də, ideyanın formalaşmasında və Milli Məclisdə qəbulunda əməyi olan bütün tərəflərə təşəkkür edirəm”.

Adalet.az xəbər verir ki, bunu iqtisadçı Eldəniz Əmirov deyib. 

“Açıq demək lazımdır ki, elektron siqaretlər cəmiyyət üçün dərin problemə çevrilmişdi. Bir tərəfdən ailə büdcələrindən bu məhsullara axan və heç bir real dəyər yaratmayan vəsaitlər, digər tərəfdən isə uzunmüddətli sağlamlıq problemləri, səhiyyə xərcləri, sosial risklər və iqtisadi itkilər mövcud idi. Bu risklər arasında sağlamlıq problemləri ön sırada dayanırdı. Buna görə də bu addım bu il Milli Məclisdə qəbul edilən qanunlar arasında açıq şəkildə təşəkkür etdiyim ilk təşəbbüslərdən biridir”, - deyə o, bildirib.

Vasif ƏLİHÜSEYN