Üç qızın videosu və qədim inanc - İntiqam VALEHOĞLU yazır

11072 | 2019-04-02 10:18

A- A+

Dünən 31 mart ermənilərin azərbaycanlılara qarşı törətdiyi soyqırımın ildönümü idi. Amma bu ildönümünün özünə elə soyqırım törətdilər ki, hər şey yaddan çıxdı. Telekanallarda çal-çağır, sosial şəbəkədə "Bu qədər asandırmı çıxıb getmək" meyxanası və üç qızın məlum videosu. Üstündən də "Space" telekanalının icraçı direktoru Kamil Şahverdiyevin açıqlaması baal kimi getdi. Kamil müəllim deyir ki, efirə verdiyimiz çal-çağır verilişləri canlı deyildi, əvvəlcədən çəkilmişdi, biz də camaatın əhvalını qaldırmaq üçün həmin verilişi efirə verdik. Burası belə.

İndi keçək üç qızın başına gələn əhvalata. Deyilənlərə inansaq, həmin qızları Cahid adlı şəxsə xalq artisti Mələkxanım Əyyubovanın qardaşı oğlu Valeh İsrafilov göndərib. Deyəsən kimsə təzə maşın alıbmış, onun "yuyurmuşlar". Yəqin ki, Vüsal da deyib, maşının "quru-quru yumayın", cızılar. Sonra da məclisdəkilərdən biri video çəkib ki, dost-tanışa göstərib fəxrlə desin ki, bax, qaqan bunun üçüylə də oturub-durub. İndi həmin üç qızı və iki oğlanı, üstəlik Mələkxanımın qardaşı oğlunu polisə çağırıblar. Yəqin ki, qanun çərçivəsində maşının "quru-quru yumamağın" izahatını hər üçündən alacaqlar. Hələ tərslikdən qızlardan biri nişanlı imiş. Ona görə bacısını da boşayırlar. Mən bir səs yazısı eşitdim, səs yazısında deyilir ki, qızın qardaşı əlində bıçaq bacısını axtarır.

Videonu mənə də tanışlardan biri göndərmişdi. Nə yalan deyim, ki dəfə baxdım. Əvvəl elə bildim ki, hansısa xarici videoyla montaj ediblər. Sonra kadrdakı maşının nömrəsini gördüm və hər şey məlum oldu.

İnanın ki, videoya baxandan canımı dərd alıb. Hələ havalar indi-indi isinir. Görəsən o qızlar nənəm demiş, azarramıyıflar ki? Sizə zarafat kimi görünə bilər. Amma nəzərə almaq lazımdır ki, yaz olsa da, havalar xoş keçmir. O gün Qaxda, elə Şamaxının özündə qar yağıb. Hələ belə getsə şaxta da olacaq. Belə havanınkı odun sobasının qırağıdı. Uzanırsan sobanın qırağına, bir çappa stəkan çay, bir qənddan da kəllə qənd...

Bu arada bəzi inanclı insanların da pərişan olduğunu sezməmək mümkünsüzdür. Videoda bir məqam var. Qızlardan biri stəkanı aparıb maşının düz qabağında sındırır, sonra balerinalara xas yerişlə yenidən içəri daxil olur. Bax, elə həmin qız imiş nişanlı. Qədim inanca görə gəlin toy öncəsi qab sındırsa, gələcəkdə heç bir problemi olmaz. Bu dəfə tərsinə oldu. Yazıq qızın nişanını geri qaytarırlar.

Əslində, məsələyə kənd uşaqlarının prizmasından baxsaq, onlar yazıq deyillər, hələ bir az da dərinə getsək, onlara əcəb olur. Kənd yerində keçinin, uzunqulağın "ümidinə qalan", sonra 1-2 quzu satıb Bakıya qız tutmaq ümidiylə gələn oğlanlar adətən, bu tip qızların "get tayıvı tap, çuşka" formasında tənələri ilə üz-üzə qalırlar. İdi Allah bilir neçə-neçə kənd uşağı videonu görüb ürəkdən sevinib. Hələ özünü seyid zənn edənlərin də olması istisna deyil.

İndi sarkazmı, ironiyanı və bu kimi digər şeyləri kənara qoyub, məsələyə azca ciddi yanaşaq. Heç kimə sirr deyil ki, istənilən (müəyyən istisnalarla) azərbaycanlı oğlanın, kişinin beynində özünü kefkom, baz, qız hərisi kimi göstərmək istəyi olur. Biz hətta bəzən bircə dəfə salam vermədiyimiz qadını da özümüzə "yaxırıq". Elə bu video da çox güman ki, həmin məqsədlə çəkilib. Yoxsa, bir kişi niyə belə bir hərəkət eləsin ki? Tutaq ki, sən o qızların hər üçü ilə yatmısan, bundan kimə nə? Bunları yazmaqla o üç qızı müdafiə etmək niyyətindən tamamilə uzağam. Yəni, videonun məclisdəkilərədn biri tərəfindən çəkilməsi qızlara haqq qazandırmır.

Məsələnin ən pis tərəfi bilirsiniz nədir? Biz cəmi 70 saniyəlik videoyla gündəmimizi dəyişə bilən xalqa, millətə, topluma çevrilirik. Cəmi 50-60 saniyəlik video ölkədə gündəmi dəyişir. Bax, bu, çox təhlükəlidir. Düşünməyə dəyər!