Prezident İlham Əliyev: “Əminəm ki, bundan sonra da bu münasibətlər uğurla inkişaf edəcək”

Azərbaycan Respublikasının həyata keçirdiyi çoxşaxəli xarici siyasət nəticəsində ölkəmiz həm regionda, həm də Avropada etibarlı tərəfdaş kimi mövqeyini daha da möhkəmləndirib. Bu siyasətin mühüm istiqamətlərindən biri də Avropa İttifaqına üzv dövlətlərlə əlaqələrin genişləndirilməsi, müxtəlif sahələr üzrə əməkdaşlığın dərinləşdirilməsi və qarşılıqlı maraqlara əsaslanan uzunmüddətli tərəfdaşlığın inkişaf etdirilməsidir. Bu baxımdan Slovakiya Respublikasının Prezidenti Peter Pelleqrinin Azərbaycana rəsmi səfəri xüsusi əhəmiyyət kəsb edir. Səfərin Qarabağdan, Azərbaycanın mədəniyyət paytaxtı Şuşadan başlaması həm rəmzi, həm də siyasi baxımdan mühüm mesaj kimi dəyərləndirilir. Bu, bir tərəfdən Azərbaycanın ərazi bütövlüyünün bərpasından sonra regionda həyata keçirilən genişmiqyaslı yenidənqurma və quruculuq işlərinə beynəlxalq diqqətin artdığını göstərir, digər tərəfdən isə dost və tərəfdaş ölkələrin Qarabağın bərpası prosesinə verdiyi dəstəyin əyani ifadəsidir.

Qeyd edək ki, 2026-cı il iyulun 14-də Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində Şuşa şəhərində Azərbaycan Prezidenti İlham Əliyev mətbuata bəyanatla çıxış edib. Dövlət başçısının səsləndirdiyi fikirlər Azərbaycan–Slovakiya münasibətlərinin dinamik inkişaf etdiyini, iki ölkə arasında siyasi dialoqun, iqtisadi əməkdaşlığın və Qarabağın bərpası istiqamətində birgə fəaliyyətin yeni mərhələyə qədəm qoyduğunu nümayiş etdirib. Prezident İlham Əliyev çıxışında Slovakiyanın işğaldan azad edilmiş ərazilərin bərpasına verdiyi töhfəni xüsusi vurğulayaraq bildirib ki, Azərbaycan bu dəstəyi yüksək qiymətləndirir. Dövlət başçısı qeyd edib ki, Slovakiya şirkətləri Qarabağın yenidən qurulması prosesində fəal iştirak edir və bu əməkdaşlıq iki ölkə arasında etimadın və qarşılıqlı tərəfdaşlığın mühüm göstəricisidir.

Prezident İlham Əliyevin sözlərinə görə, səfər çərçivəsində hər iki ölkə lideri Ağdam rayonunun Baş Qərvənd kəndinə gedərək Slovakiya şirkəti tərəfindən həyata keçirilən "Ağıllı kənd" layihəsi ilə yaxından tanış olacaqlar. Bu layihə müasir texnologiyaların tətbiqi, dayanıqlı inkişaf prinsipləri və innovativ idarəetmə mexanizmləri əsasında kənd yaşayış məntəqələrinin yenidən qurulmasını nəzərdə tutur."Ağıllı kənd" konsepsiyası yalnız yaşayış evlərinin tikintisini deyil, eyni zamanda rəqəmsal infrastrukturun yaradılmasını, alternativ enerji mənbələrinin tətbiqini, müasir su və kommunikasiya sistemlərinin qurulmasını, kənd təsərrüfatında innovativ texnologiyaların istifadəsini və əhalinin yüksək həyat səviyyəsinin təmin edilməsini özündə birləşdirir. Slovakiya şirkətinin bu layihədə iştirakı Avropa ölkələrinin Qarabağın bərpasına verdiyi real dəstəyin mühüm nümunələrindən biridir. 

Azərbaycan son illərdə Avropanın enerji təhlükəsizliyinin təmin edilməsində mühüm rol oynayan ölkələrdən birinə çevrilib. Bu baxımdan Slovakiya ilə enerji sahəsində əməkdaşlığın genişləndirilməsi hər iki dövlət üçün qarşılıqlı maraq doğuran istiqamət kimi qiymətləndirilir. Təbii qaz təchizatı, enerji təhlükəsizliyi, yaşıl enerji layihələri və yeni enerji marşrutlarının inkişafı gələcək əməkdaşlığın əsas istiqamətləri sırasında yer alır.Bununla yanaşı, iqtisadi əlaqələrin genişləndirilməsi məqsədilə sənaye, kənd təsərrüfatı, nəqliyyat-logistika, rəqəmsal iqtisadiyyat və yüksək texnologiyalar sahəsində birgə layihələrin həyata keçirilməsi də müzakirə olunan məsələlər sırasında olub. 

Azərbaycan Prezidenti vurğulayıb ki, dövlət başçılarının görüşü ilə yanaşı, hər iki ölkənin nümayəndə heyətlərinin üzvləri arasında da intensiv müzakirələr aparılır. Danışıqların həm Şuşada, həm də növbəti gün Bakıda davam etdirilməsi planlaşdırılıb.Bu təmaslar gələcək əməkdaşlıq istiqamətlərinin müəyyənləşdirilməsi, yeni layihələrin hazırlanması və əldə olunmuş razılaşmaların praktiki mərhələyə keçməsi baxımından mühüm əhəmiyyət daşıyır. Diplomatik münasibətlərin möhkəmləndirilməsi ilə yanaşı, biznes dairələri arasında əlaqələrin genişlənməsi də prioritet istiqamətlərdən biri kimi qiymətləndirilir. 

Prezident İlham Əliyev Slovakiya Prezidentinin səfərinin Qarabağdan başlamasının xüsusi rəmzi məna daşıdığını bildirib. Şuşa şəhəri Azərbaycanın mədəniyyət paytaxtı olmaqla yanaşı, ölkənin suverenliyinin və ərazi bütövlüyünün bərpasının əsas simvollarından biri hesab olunur. Xarici dövlət başçılarının Şuşaya səfərləri beynəlxalq ictimaiyyətin bölgədə aparılan yenidənqurma işləri ilə tanış olması, Azərbaycanın həyata keçirdiyi genişmiqyaslı layihələri yaxından izləməsi və regionda formalaşan yeni reallıqları qiymətləndirməsi baxımından böyük əhəmiyyət daşıyır. 

Prezident İlham Əliyev çıxışında Peter Pelleqrinin Azərbaycana ilk dəfə səfər etmədiyini də xatırladıb. Dövlət başçısı bildirib ki, Peter Pelleqrini əvvəlki vəzifələrində – Slovakiya parlamentinin sədri və Baş nazir kimi də Azərbaycana səfərlər edib. Bundan əlavə, Peter Pelleqrini Prezident kimi Azərbaycanda keçirilən beynəlxalq iqlim konfransında iştirak edib. Onun ölkəmizə mütəmadi səfərləri Azərbaycan–Slovakiya münasibətlərinə verdiyi önəmin göstəricisi kimi qiymətləndirilir. Prezident İlham Əliyevin sözlərinə görə, bu gün həyata keçirilən rəsmi səfər iki ölkə arasında formalaşmış səmimi münasibətlərin və yüksək səviyyəli siyasi dialoqun davamıdır. Hər iki ölkənin ikitərəfli münasibətlərə böyük önəm verməsi bu prosesin davamlı xarakter almasına şərait yaradır. 

Prezident İlham Əliyevin bəyanatı bir daha nümayiş etdirdi ki, Azərbaycan və Slovakiya arasında münasibətlər qarşılıqlı hörmət, etimad və konkret nəticələrə yönəlmiş əməkdaşlıq prinsipləri üzərində qurulub. Son illərdə formalaşan yüksək səviyyəli siyasi dialoq, qarşılıqlı səfərlər və birgə layihələr əlaqələrin davamlı inkişafını təmin etməklə yanaşı, hər iki ölkənin regional və beynəlxalq əməkdaşlıq gündəliyində də mühüm yer tutur.

Slovakiya Prezidenti Peter Pelleqrinin Azərbaycana rəsmi səfəri iki ölkə arasında strateji tərəfdaşlığın daha da möhkəmləndirilməsi baxımından mühüm hadisə kimi qiymətləndirilir. Şuşada keçirilən görüşlər, Qarabağın bərpası layihələri ilə tanışlıq, iqtisadi və enerji əməkdaşlığı üzrə aparılan müzakirələr Azərbaycan–Slovakiya münasibətlərinin yeni inkişaf mərhələsinə qədəm qoyduğunu göstərir. Qarabağın yenidən qurulması prosesində Slovakiya şirkətlərinin iştirakı beynəlxalq əməkdaşlığın uğurlu nümunəsi olmaqla yanaşı, bölgənin sosial-iqtisadi inkişafına mühüm töhfə verir. Eyni zamanda, yüksək səviyyəli siyasi dialoq, qarşılıqlı etimad və ortaq maraqlar Azərbaycan ilə Slovakiya arasında uzunmüddətli və səmərəli əməkdaşlığın gələcək perspektivlərini daha da gücləndirir. 

Aybəniz Rüstəmova

Avrasiya universitetinin Humanitar fənlər və regionşünaslıq 

kafedrasının müdiri, tarix üzrə fəlsəfə doktoru, dosent